Dmitri Chirciu
03 Јули 2023•Ажурирај: 05 Јули 2023
МОСКВА (АА) - Рускиот министер за одбрана Сергеј Шојгу денес изјави дека вооружениот бунт на руската безбедносна компанија „Вагнер“ не влијаел врз акциите на воените трупи и дека тие продолжиле храбро и несебично да ги исполнуваат задачите што им биле доделени, јавува Анадолу.
За време на денешниот состанок со воени претставници, Шојгу ја даде својата прва изјава за вооружениот бунт на руската платеничка група „Вагнер“ против руските власти минатиот месец.
Опишувајќи го бунтот како „обид за дестабилизација на ситуацијата во земјата“ и „провокативна акција“, Шојгу рече: „Таквите планови пропаднаа поради фактот што персоналот на вооружените сили на Русија покажа лојалност кон своите вредности и воена должност врз кои е положено заклетва. Оваа провокација не влијаеше врз дејствувањата на трупите. Војниците продолжија храбро и несебично да ги извршуваат задачите“, рече Шојгу и им се заблагодари на руските војници.
Осврнувајќи се на ситуацијата на фронтовите во Украина, Шојгу потврди дека руските вооружени сили продолжиле со нападите и го намалиле офанзивниот потенцијал на украинската војска.
Тој додаде дека нападите на украинските воени сили во правец на Доњецк и Запорожје биле неуспешни и додаде: „Во тие насоки се уништени 920 парчиња разновидна воена опрема на украинската војска, од кои 15 авиони, три хеликоптери, 16 тенкови Леопард. Тоа значи дека речиси целосно се уништени тенкови од овој тип што на Украина ѝ беа доставени од Португалија и Украина.“
На крајот, Шојгу потврди дека украинската војска не може да ги постигне своите цели во ниту една насока.
Во сабота, 24 јуни, паравоената група „Вагнер“ го обвини руското Министерство за одбрана дека ги нападнало нејзините борци.
Потоа основачот на групата „Вагнер“, Евгениј Пригожин, прогласи „Марш на правдата“ и со своите сили ја премина украинската граница и влезе во рускиот град Ростов на Дон, каде што ги окупираа клучните воени објекти.
Пригожин најави дека неговите борци тргнуваат кон Москва, што го натера Кремљ да ги заостри безбедносните мерки во различни региони на Русија.
Тој подоцна рече дека неговите борци решиле да се вратат назад за да избегнат крвопролевање кога биле на 200 километри од Москва, додека белорускиот претседател Александар Лукашенко рече дека разговарал со шефот на „Вагнер“ со дозвола на Владимир Путин, при што Пригожин го прифатил договорот за деескалација.
Во согласност со договорот постигнат со посредство на Лукашенко, кој ја смири кризата доцна во саботата, надлежните институции на Руската Федерација ја затворија кривичната постапка против Пригожин, кој се наоѓа во Белорусија.
