Јапонија вети 32,5 милиони долари за Рохинџа муслиманите во Бангладеш

ДАКА (АА) - Јапонската Влада ќе обезбеди 32,5 милиони долари помош за бегалците Рохинџи во Бангладеш, пренесува Anadolu Agency (AA).

„Помошта ќе биде искористена за поддршка на Рохинџа муслиманите во Кокс Базар во Бангладеш и на тамошните заедници, кои им се домаќини“, соопшти јапонската Амбасада во Дака.

„Одлуката беше донесена на 7 февруари“, се додава во соопштението.

„Од големиот прилив на бегалци во Бангладеш во август 2017 година, јапонската Влада на одредени меѓународни организации им додели околу 50,2 милиони долари, покрај најновата ветена помош“, се вели во соопштението.

Јапонија ќе ја прошири хуманитарната помош за бегалците Рохинџи и заедниците домаќини во Кокс Базар преку управување со бегалските кампови, обезбедување храна, засолништа, медицински услуги и обуки.

Помошта ќе биде доделена преку меѓународните агенции - Високиот комесаријат на Обединетите нации за бегалци (UNHCR), Меѓународната организација за миграција (IOM), Фондот за население на Обединетите нации (UNFPA), Меѓународниот фонд за деца за итни случаи на Обединетите нации (UNICEF), Организацијата за храна и земјоделство на Обединетите нации (FAO), Организацијата на Обединетите нации за родова рамноправност и зајакнување на жените (UNWomen), Светската програма за храна (WFP), Светската здравствена организација (WHO), Меѓународниот комитет на Црвен крст (ICRC), Глобалното партнерство за образование (GPE), Лекарите без граници (MSF, Médecins Sans Frontières).