Англија се подготвува за финалето на ЕВРО 2024
Овој потег е со цел да му се овозможи на персоналот навреме да се врати дома или во пабовите за почетокот на мечот, без намалување на платата за тие часови
ЛОНДОН (АА) - Во пресрет на финалниот натпревар на ЕВРО 2024 Англија против Шпанија, компаниите низ Велика Британија прават посебни подготовки за да им овозможат на вработените да уживаат во натпреварот и возбудата, јавува Анадолу.
Многу очекуваниот натпревар, закажан да почне во 20 часот по локално време во недела, кој потенцијално може да продолжи до 23 часот ако се оди на пенали, поттикна неколку компании да понудат порано завршување со работа за вработените и подоцна почнување следниот ден.
Лидл, спонзор на натпреварот, објави дека во понеделник сите свои продавници во Англија ќе ги отвори еден час подоцна за да се осигури дека персоналот може да учествува во прославите по натпреварот.
Теско, исто така, ги испочитува вработените со затворање на своите продавници во 19:30 часот во недела, порано од вообичаеното во 22 или 23 часот.
Овој потег е со цел да му се овозможи на персоналот навреме да се врати дома или во пабовите за почетокот на мечот, без намалување на платата за тие часови.
Сеинсбурис, исто така, го следи примерот и порано ги затвора продавниците и бензинските пумпи низ Англија.
Британскиот премиер Кир Стармер, говорејќи на самитот на НАТО во Вашингтон, ја изрази својата поддршка за одбележување доколку Англија победи.
Сепак, тој не потврди дополнителен слободен ден, велејќи: „Секако треба да го одбележиме настанот... Мора да го одбележиме на некој начин, но најважно е да го реализираме тоа во недела.“
Стармер претходно ги поддржа повиците за дополнителен ден за одмор доколку Англија победи на женското ЕВРО 2022 и на Светското првенство за жени, иако тогашната Влада на конзервативците го отфрли поради значителната цена за тоа, проценета на 2,9 милијарди фунти.
