По прекинот на натпреварот Ница - Олимпик Марсеј во француската фудбалска Лига 1, тимот на Марсеј не се врати на теренот

ПАРИЗ

По одлуката да продолжи натпреварот Ница - Олимпик Марсеј, што се одигра во рамките на француската Прва фудбалска лига (Лига 1), кој беше прекинат поради влегувањето на навивачите на Ница на теренот, играчите на гостинскиот тим не се вратија на теренот, известува Агенција Анадолија (АА).

Последниот натпревар од третото коло на француската Лига 1 меѓу Ница и Олимпик Марсеј беше прекинат во 77. минута поради влегувањето на навивачите на Ница на теренот. По приближно пауза од 1,5 час, судиите одлучија натпреварот да продолжи од моментот кога е прекинат.

Откако играчите на Ница го зазедоа своето место на теренот, судијата со свирка го прогласи продолжувањето на средбата, но фудбалерите на Марсеј одбија да излезат на теренот. Потоа, судијата го заврши натпреварот и играчите на домашниот тим заминаа во соблекувалната.

Се очекува Француската професионална фудбалска лига (LFP) да донесе одлука во врска со овој натпревар.

Пабло Лонгорија, претседателот на фудбалскиот клуб Олимпик Марсеј, за францускиот спортски канал „РМЦ Спорт“ изјави дека Француската професионална фудбалска лига (LFP) одлучила да го продолжи натпреварот, но додаде дека тоа за Олимпик е неприфатливо.

Во вестите објавени во францускиот печат се наведува дека играчите на Марсеј, Луан Перес, Матео Гендузи и Димитри Паје биле повредени во настаните што избија за време на натпреварот.

Натпреварот меѓу Ница и Олимпик Марсеј беше прекинат во 77-та минута кога навивачите на Ница влегоа во теренот, откако играчот на Марсеј, Димитри Паје, кон трибините фрли некои од предметите што претходно биле фрлени кон него.

Во моментот на прекинот на средбата, домашната екипа имаше предност од 1:0 над Марсеј со голот што Долберг го постигна во 49. минута.