Tuba Şahin
10 Декември 2020•Ажурирај: 11 Декември 2020
АНКАРА (АА) - Турскиот министер за индустрија и технологија, Мустафа Варанк, денеска изјави дека Турција основала Центар за четвртата индустриска револуција за управување со дигиталната трансформација со помош на меѓународна соработка, јавува Агенција Анадолија (АА).
Говорејќи на онлајн церемонијата на отворање на центарот со седиште во Истанбул, Варанк изјави:
„Силната меѓународна соработка е од витално значење за максимизирање на конкурентската предност на дигиталната трансформација. Турскиот Центар на четвртата индустриска револуција ќе игра клучна улога во ова.“
„Центарот ќе развие политички студии и проекти за забрзување на дигиталната трансформација, особено во областа на индустријата, во соработка со јавни и приватни институции, академици и невладини организации“, нагласи Варанк.
Истакнувајќи дека Турција во јануари се приклучила на Центарот за мрежа на четвртата индустриска револуција (C4IR) на Светскиот економски форум (WEF), Варанк рече дека центарот е еден од двата во Европа и дека има само девет такви во светот.
Центарот на четвртата индустриска револуција (C4IR) има за цел да ги забрза научните и технолошките истражувања.
Варанк рече дека Турција е подготвена да ги дефинира основните принципи за етичка употреба на вештачката интелигенција покрај спроведувањето студии за правилна и навремена употреба на индустриските податоци.
Осврнувајќи се на програмата за стипендии финансирана од Владата започната во декември 2018 година, Варанк рече дека земјата очекува да привлече најмалку 100 извонредни истражувачи со нов повик што ќе биде објавен следната година.
„Новите пристигнати истражувачи ќе учествуваат во напорите на Турција во критичните области што создаваат разлика. Посветени сме да ја направиме Турција една од земјите кои ги поставуваат трендовите за четвртата индустриска револуција“, изјави Варанк.
