Özcan Yıldırım
23 Јануари 2025•Ажурирај: 24 Јануари 2025
ИСТАНБУЛ (АА) – Претседателот на Република Туркије, Реџеп Таип Ердоган, денеска изјави дека неговата земја е подготвена да ја даде сета потребна поддршка за решавање на спорот меѓу Руанда и Демократска Република Конго, доколку тоа го сакаат и двете страни, известува Анадолу.
„Ние, како Туркије, сме подготвени да ја обезбедиме сета потребна поддршка за решавање на ова прашање, што ќе придонесе за стабилноста и мирот во регионот на Големите Езера, доколку двете страни го сакаат тоа“, рече Ердоган по средбата со претседателот на Руанда, Пол Кагаме, во Анкара.
Конго ја обвинува соседна Руанда дека ја поддржува бунтовничката група М23, која започна востание во источно Конго во 2022 година. Руанда ги отфрла овие обвинувања.
- Руанда е една од земјите што даде најбрза поддршка во борбата против ФЕТО
Ердоган ги пофали напорите на Руанда во борбата против терористичката организација ФЕТО. Претседателот на Туркије истакна дека Руанда е една од земјите што даде најбрза поддршка во борбата против ФЕТО, која го организираше неуспешниот обид за воен удар во Туркије на 15 јули 2016 година. За време на обидот за државен удар животот го загубија 252 лица, а 2.734 беа повредени.
Терористичката организација ФЕТО стои зад долгорочната кампања за соборување на државните структури на Туркије преку инфилтрација на терористи во државните институции, особено во Армијата, полицијата и судството. Туркије ја предупредува меѓународната заедница дека терористите на ФЕТО претставуваат закана за сите земји во кои дејствуваат.
Ердоган и Кагаме присуствуваа и на церемонијата на потпишување четири билатерални договори за соработка меѓу Туркије и Руанда.
Станува збор за договори за соработка меѓу Агенцијата за радиодифузија на Руанда (РБА) и Турската радио и телевизиска корпорација (ТРТ), за соработка во истрагите за несреќи, за соработка во областа на медиумите и комуникациите и за соработка меѓу Дирекцијата за одбранбени индустрии на Туркије и Министерството за одбрана на Руанда.
