Merve Gül Aydoğan Ağlarcı
25 Ноември 2022•Ажурирај: 25 Ноември 2022
АНКАРА (АА) - Турскиот претседател Реџеп Таип Ердоган ги критикуваше меѓународните политичари, невладините организации и медиумите, поради тоа што не реагирале на последните терористички напади на ЈПГ/ПКК во југоисточна Туркије, во кои загинаа тројца цивили, вклучувајќи дете и наставник, јавува Агенција Анадолија (АА).
„Доколку терористичката организација на кое било друго место убиваше наставници и деца на таков грозоморен начин, тогаш таа тема ќе беше прва на агендата со денови, недели и месеци“, изјави Ердоган во говорот на настанот по повод Меѓународниот ден за елиминација на насилството врз жените.
Минатата недела, најмалку три лица, меѓу кои едно дете и наставник, беа убиени во повеќе ракетни напади на терористичката организација ЈПГ/ПКК во југоисточната турска област Газиантеп.
„Кога станува збор за Туркије, освен неискрените пораки за осуди, ниту политичарите, ниту невладините организации, ниту медиумите не го кренаа гласот во врска со тоа“, рече Ердоган.
Тој, исто така, го осуди неуспехот на западните бранители на човекови права да застанат на страната на мајките од Дијарбакир - група мајки кои протестираат и бараат враќање на нивните деца за кои велат дека биле киднапирани од терористичката организација ПКК.
„Каде се глобалните групи за човекови права? Дали некогаш доаѓаат и ги посетуваат мајките од Дијарбакир?“
Од 3 септември 2019 година, семејствата чии деца според наводите биле киднапирани или насилно регрутирани од ПКК, демонстрираат пред канцелариите на Демократската партија на народите (ХДП) во Дијарбакир - партија за која турската Влада вели дека има поврзаност со терористичката организација и моментално се соочува со затворање на случајот во највисокиот суд на нацијата.
Оттогаш, демонстрациите се проширија и во други области, вклучувајќи ги Ван, Муш, Ширнак и Хакќари.
Во својата над 35-годишна терористичка кампања против Туркије, ПКК, којашто е на листата на терористички организации во Туркије, САД и Европската Унија, одговорна е за смртта на над 40.000 луѓе, меѓу кои и деца и жени. ЈПГ е сириски огранок на терористичката организација ПКК.
