Serdar Açıl,Tanju Özkaya
26 Мај 2021•Ажурирај: 27 Мај 2021
АНКАРА (АА) - Обвинителството во Анкара започна постапка против двајца бегалци, припадници на терористичката организација ФЕТО, за навредливи објави за турскиот претседател Реџеп Таип Ердоган објавени во Соединетите Американски Држави (САД), јавува Агенција Анадолија (АА).
Хафса Гирдап и Мехмет Мурат Кавал, за кои претходно е издаден налог за приведување за членување во терористичката организација ФЕТО, се наведени како осомничени во документот кој е проследен до Министерството за правда заради одобрување за кривична постапка.
Исто така за осомничените се бара казна затвор во траење до четири години и шест месеци за „јавно навредување на претседателот на Турција“.
Се наведува дека на 3 март 2021 година на Тајмс Сквер во Њујорк биле истакнати плакати со навреди за претседателот Ердоган, а со дополнително истражување утврдено е дека зад поставувањето на овие содржини стои компанија во сопственост на ФЕТО чии раководители се Хафса Гирдап и Мехмет Мурат Кавал.
За Кавал се наведува дека е одговорно лице во рамките на структурите на ФЕТО во САД и дека е шеф на организацијата „Advocates of Silenced Turkey (AST)“ со седиште во САД.
Во истата организација работи и осомничената Хафса Гирдап. За неа во документот наведено е дека вршела пропаганда против државата Република Турција. За неа претходно е издаден налог за приведување.
Обвинителството во Анкара води истрага против двајцата осомничени за „членство во вооружена терористичка организација“.
Терористичката организација ФЕТО е одговорна за крвавиот обид за пуч во Турција ноќта на 15 јули 2016 година.
Станува збор за терористичка организација предводена од Фетула Ѓулен, со живеалиште во Соединетите Американски Држави (САД), а чија екстрадиција Турција официјално ја побара од САД.
Припадниците на таа терористичка организација со години, преку местење на испити, напредувале во службата, инфилтрирајќи се на тој начин во институциите на државата. Потоа, најпрво во декември 2013 година, приврзаниците на ФЕТО во турското правосудство со монтиран процес за наводна корупција се обидоа да процесуираат голем бројни високи функционери.
Неколку години подоцна следеше крвав обид за државен удар на терористите на ФЕТО, односно обид за пуч извршен од офицери инфилтрирани од ФЕТО во турската војска.
Истрагата во врска со терористичката организација ФЕТО покажа дека станува збор за глобална мрежа којашто не претставува опасност само за Турција, туку и за секоја друга земја во која е активна. На тоа во повеќе наврати укажуваа турските официјални претставници. За време на обидот за пуч во Турција загинаа 251 лице, а ранети беа околу 2.200 лица.
