Valverde: Nuk e di nëse do të mbetem trajner i Barcelonës

Ernesto Valverde deklaroi se "nuk di nëse do të mbetet trajner i Barcelonës", pas disfatës së mbrëmshme në ”Anfield” ku pësoi debakël nga Liverpooli me shifrat 0:4, me çka ekipi i tij u eliminua në gjysmëfinale të Ligës së Kampionëve të UEFA, përkundër një avantazhi 3:0 nga ndeshja e parë, transmeton Anadolu Agecny (AA).

"Nuk e di nëse do të qëndroj, nuk kam pasur kohë të mendoj për këtë gjë. Një është e sigurt se unë marr përgjegjësinë për debaklin", tha Valverde.

Në “zonën mix” në stadiumin Anfield, i vetmi lojtar i Barcelonës që u ndal para gazetarëve ishte Sergio Busquets.

”U kërkojmë falje tifozëve. U përsërit Roma, ndërsa atë natë besonin se është vetëm një natë e keqe”, tha Busquets.

Barcelona vitin e kaluar pësoi eliminim nga Roma në çerekfinale. Atëherë në ndeshjen e parë triumfuan 4:1, megjithatë në ndeshjet e kthimit u mundën me rezultatin 0:3.