بانگەوازێک بۆ جەزائیر و مەغریب لەبارەی پەنابەرانی سووری

رەبات - AA

رێکخراوی چاودێری مافەکانی مرۆڤ داوای لە جەزائیر و مەغریب کرد کێشەی پەنابەرانی سووری لە نێوان سنوورەکانیان چارەسەر بکەن.

رێکخراوی چاودێری مافەکانی مرۆڤ راپۆرتێکی بڵاو کردەوە و تێدا ئاماژەی بەوە کراوە کە وڵاتی جەزائیر و مەغریب رێگەیان بە تێپەڕبوونی دوو گرووپی پەنابەرانی سووری بۆ وڵاتەکانیان نەداوە و ھاتووە "ئەو پەنابەرانە کە لە نێوانیاندا ئافرەت و منداڵ ھەیە، لە دۆخێکی نالەباردا لە ١٨ی نیسانی لە سنوور لە چاوەڕوانیدان".

لە راگەیەندراوەکەدا روونیشکراوەتەوە کە ژمارەی ئەو پەنابەرانە ٥٥ کەسە کە ٢٢یان منداڵ و ٢٠یان ئافرەتن و راشگەیەندراوە کە دوو ئافرەت دووگیانە و یەکێکیان لە ٢٣ی نیسان بە ناچاریی لە سنوور منداڵێکی لەدایکبووە.

لە بەشێکی راگەیەندراوەکەدا بانگەوازی بۆ ئیدارەی جەزائیر و مەغریب کراوە کە دەستبەجێ پێداویستی پەنابەران دابین بکرێت و داواکارییەکانیان بە ھەند وەربگیرێت.

لە لایەکی دیکەوە بەرپرسی رێکخراوی چاودێری مافەکانی مرۆڤ لە رۆژھەڵاتی ناوەڕاست و باکووری ئەفریقا، سەرە لیا ویستۆن لە لێدوانێکدا رایگەیاند "حکوومەتی جەزائیر و مەغریب کە بەرپرسیارێتی لەبارەی پەنابەرەکان دەخەنە ئەستۆ یەکتر، پێویستە ھەردووکیان پێشوازی لە پەنابەرەکان بکەن. ئەو منداڵ و ئافرەت و پیاوانە کە لە سنووری ھەردوو وڵات دەمێننەوە، لە چۆڵایی دەخەون و تەنانەت ناتوانن داواکاریی پەنابەرێتی پێشکەش بکەن".