دانیشتنی پەرلەمانی کوردستان دەستی پێکرد

ھەولێر - AA

لە دانیشتنەکەدا، چوار پرۆژەیاسا و بابەتی دیکە تاوتوێ دەکرێن و بڕیاره‌ له‌ كاتژمێره‌كانی داهاتوودا میوانداری وەزیرانی ناوخۆ، تەندروستی، کاروباری پێشمەرگە، دارایی و ئابووری، پلاندانان و وەزیری ھەرێم بۆ کاروباری دانوستاندنی ھەرێمی کوردستان و عێراق بكرێت.

لە دانیشتنەکەدا، ھەروەھا دەستلەکارکێشانەوەی ئەندامی فراکسیۆنی کۆمەڵی ئیسلامی لە پەرلەمانی کوردستان، سۆران عومەر دەخرێتە دەنگدانەوە.

ھەروەھا خوێندنەوە دەکرێت بۆ راپۆرتی کۆبوونەوەی ھاوبەشی لیژنەی کاروباری پێشمەرگە و ناوچە کورستانییەکانی دەرەوەی ھەرێم سەبارەت بەدۆخی ناوچە کوردستانییەکانی دەرەوەی ئیدارەی ھەرێم و ھێرشەکانی تیرۆریستانی داعش بۆسەر ناوچەکە، بەئا‌مادەبوونی وەزیری ناوخۆ، وەزیری کاروباری پێشمەرگە، وەزیری ھەرێم بۆ کاروباری دانوستاندن لەنێوان ھەرێم و بەغدا و دەستەی گشتیی ناوچە کوردستانییەکانی دەرەوەی ئیدارەی ھەرێم لە حکوومەتی ھەرێمی کوردستان.

راپۆرتی ھاوبەشی لیژنەی کاروباری پێشمەرگە، ناوخۆ و ئاسایش و ئەنجوومەنە خۆجێیەکان و پەیوەندییەکان و رەوەندی کوردستانی سەبارەت بەدۆخی ناوچە سنوورییەکان و راپۆرتی لێژنەی تەندروستیی سەبارەت بەپەتای کۆرۆنا دەخوێندرێنەوە.