راگەیەندراوی هاوبەشی كۆبوونەوەی بارزانی و حەلبوسی

ھەولێر - AA

سەرۆکی پێشووی ھەرێمی کوردستان، مەسعود بارزانی پێشوازی لە سەرۆکی هاوپەیمانی هێزە عێراقییەکان و ئەنجوومەنی نوێنەرانی عێراق، محەمەد حەلبوسی کرد.

بەپێی ھەواڵێکی ماڵپەری مەسعود بارزانی، ئەمڕۆ یەکشەممە، سەرۆکی پێشووی ھەرێمی کوردستان پێشوازی لە سەرۆکی ھاوپەیمانی ھێزە عێراقییەکان و سەرۆکی ئەنجوومەنی نوێنەرانی عێراق، محەمەد حەلبوسی کردووە.

لە کۆبوونەوەکەدا گفتوگۆ لەبارەی رەھەندەکانی رەوشی ئێستای عێراق و ناوچەکە و پێکھێنانی حکوومەتی نوێی عێراق کراوە.

بەپێی راگەیەنراوی کۆبوونەوەکە، ھەردوولا رێککەوتوون لەسەر کارکردن لەگەڵ ھەموو ھێزە سیاسییەکان لەپێناو دەربازبوون لەو تەنگژەیەی ئێستا و بەشداریکردن لە گێڕانەوەی سەقامگیری بۆ بەغدا و پارێزگاکانی دیکەی خوارووی عێراق.

بارزانی و حەلبوسی جەختیان لەوە کردووەتەوە کە پێویستە حکوومەتی داھاتووی عێراق نوێنەرایەتی ھەموو پێکھاتەکانی عێراق بکات و، لە سەر بنەمای شەراکەتی نیشتمانیی بێت.

سەرۆکی پێشووی ھەرێمی کوردستان و سەرۆکی ھاوپەیمانی ھێزە عێراقییەکان جەختیان لەوە کردووەتەوە کە دەبێ بەرنامەی حکوومەت بە ڕوونی ئاماژە بە ئامادەکاریی بکات بۆ ئەنجامدانی ھەڵبژاردنی پێشوەختە بەزووترین کات، وەک جێبەبەجێکردنی خواستی خۆپیشاندەران و، ئەم بابەتە دەبێ ببێتە کاری لە پێشینەی حکوومەتی داھاتوو .

لە راگەیەنراوە هاوبەشەکەی بارزانی و حەلبوسیدا ئاماژە بەوەشدراوە کە پێویستە بەرنامەی حکوومەتی داھاتوو پلانێکی روون و ئاشکرا لەخۆ بگرێ بۆ گێڕانەوەی شکۆ بۆ دامودەزگەکانی دەوڵەت و پاراستنی ئاشتیی کۆمەڵایەتی و، کۆتاییھێنان بە دەستوەردانی دەرەکی و، ھێشتنەوەی چەک تەنھا بەدەست دەوڵەتەوە و، نەھێشتنی دیاردەی چەکدارە نافەرمییەکان.

لە بەشێکی دیکەی راگەیەنراوە هاوبەشەکەی بارزانی و حەلبوسی تیشک خراوەتە سەر بەردەوامیی کاری ھاوبەش لەگەڵ ھێزەکانی ھاوپەیمانیی نێودەوڵەتی لە پێناو یارمەتیدانی عێراق لە ڕووبەڕووبوونەوەی ھەڕەشەکانی تیرۆر و زاڵبوون بەسەر پاشماوەی تیرۆریستانی داعشدا.

لە کۆتایی راگەیەنراوە هاوبەشەکەی سەرۆکی پێشووی ھەرێمی کوردستان و سەرۆکی ھاوپەیمانی ھێزە عێراقییەکان، ئاماژە بە کارکردن لە پێناو بەردەوامبوونی پەیوەندیی دوولایەنە ئەویش لەپێناو ھەماھەنگکردنی ھەڵوێستەکانی ھەردوولا و ھاوبەشەکانی تر کراوە.