لە شەڕەكانی فەللوجە 100 چەكداری داعش كوژراون

فەرماندەی ئۆپەڕاسیۆنەكانی ئەنبار لیوا روكن ئیسماعیل مەحلاوی سەبارەت بە دوایین پێشهاتەكانی ئۆپەڕاسیۆنی كۆنترۆڵكردنەوەی شاری فەللوجە رایگەیاند، هێزەكانی سوپا و پۆلیسی فیدڕاڵ و هۆزە چەكدارەكانی سوننە لە پێشڕەوییەكانیان بەرەو ناو شارەكە بەردەوامن و هێزەكانی دیكەی عێراق بەرەو جزیرەی خالیدیە لە رۆژهەڵاتی رومادی پێشڕەویی دەكەن.

مەحلاوی لە لێدوانێكدا بۆ ئاژانسی ئانادۆڵو ئاماری زیانی گیانیی شەڕی ئۆپەڕاسیۆنی كۆنترۆڵكردنەوەی شاری فەللوجەی ئاشكرا كرد و رایگەیاند، بەپێی زانیارییەكان هێزەكانی عێراق و هۆزە چەكدارەكان بە پشتیوانی فڕۆكەكانی هاوپەیمانان و عێراق، لە دوێنێ‌ بەیانییەوە هەتا بەیانی ئەمڕۆ، توانیویانە لە هەر دوو میحوەری باشووری فەللوجە و جزیرەی خالیدیە كە بە 23 كیلۆمەتر دەكەوێتە رۆژهەڵاتی رومادی، 100 چەكداری داعش بكوژن و 18 ئۆتۆمبێلی بۆمبڕێژكرا و پێنج تۆنێلی رێكخراوی داعش تێك بشكێنن.

فەرماندەی ئۆپەڕاسیۆنەكانی ئەنبار ئاماژەی بەوەشدا، هەر لە ئەنجامی شەڕەكاندا لە باشووری فەللوجە و جزیرەی خالیدیە، ژمارەیەك سەرباز و چەكداری هۆزەكانی سوننە بریندار بوون و روونیشی كردەوە، هێزەكانی ئەمنی و هۆزە چەكدارەكان لە پێشڕەوییەكانیان بەرەو ناو شاری فەللوجە، توانیویانە بە دووری یەك كیلۆمەتر لە باشووری شارەكە نزیك ببنەوە و لە رۆژهەڵاتی رومادیش، هێزەكانی دیكەی عێراق بەرەو ناو جزیرە خالیدیە پێشڕەویی دەكەن.

ئەفسەری سەربازیی لە فەرماندەی ئۆپەڕاسیۆنەكانی ئەنبار عەقید وەلید دلێمی بە ئاژانسی ئانادۆڵوی رایگەیاند، لە شەڕەكانی دوێنێ‌ بەیانی هەتا بەیانی ئەمڕۆ لە هەر دوو میحوەری باشووری فەللوجە و جزیرەی خالیدیە، 16 سەربازی سوپای عێراق و حەوت چەكداری هۆزەكانی سوننە بریندار بوون.

لەگەڵ ئەوەی ئەمڕۆ چوارەم رۆژە، ئۆپەڕاسیۆنی كۆنترۆڵكردنەوەی شاری فەللوجە بەردەوامە، هاوكات شەڕەكانیش لە دەوروبەری شارەكە لە نێوان هێزەكانی عێراق و هۆزە چەكدارەكانی سوننە و حەشدی شەعبی لەگەڵ چەكدارانی رێكخراوی داعش بەردەوامە.

هەتا ئێستاش لە میانی ئۆپەڕاسیۆنەكەدا، هێزەكانی عێراق قەزای گەرمە و ناوچەكانی دەوروبەری لە باكووری رۆژهەڵاتی فەللوجەیان كۆنترۆڵ كردووەتەوە.