ھەڵەبجە.. خۆپیشاندان دەستیپێکرد

ھەڵەبجە- AA
بەئامادەبوونی ژمارەیەکی بەرچاو لەمامۆستایان و فەرمانبەران و ھاووڵاتییانی شارەکە، خۆپیشاندانی ناڕەزایی مەدەنی لەھەڵەبجە دەستیپێکرد و خۆپیشاندەران بەرێپێوان بەرەو ناو بازاڕی ھەڵەبجە بەڕێکەوتن.
پێش بەڕێکەوتنیان، مامۆستایان زەنگی بایکۆتی ساڵی نوێی خوێندنیان لێدا و مامۆستایان راگەیەنراوێکیان خوێندەوە کە تیایدا ھاتووە: "راشکاوانە دەڵێین باوەڕمان نییە قەیرانی دارایی ھێندەش قووڵ و قورس بێت لەسەر حکوومەتی ھەرێمی کوردستان کە ژیانی خەڵکی کوردستانیان بەم ئاستە گەیاندووە، بەڵکو بەبڕوای ئێمە قووڵکردنەوەی قەیرانەکە دەستکردە و لەخزمەتی قەیران و بارودۆخە سیاسیەکەدایە".
لەبەشێکی تری راگەیەنراوەکەدا ھاتووە: "لێرەوە رایدەگەیەنین ئەمڕۆ زەنگی بایکۆتی خوێندن لێدەدەین، لەپێناو گەڕاندنەوەی قەدر و حورمەت بۆ پرۆسەی پەروەردە و دابینکردنی ئایندە بۆئەھلی زانست و زانیاری تا ئەو کاتەی داواکاریەکانمان جێبەجێ دەکرێن، نەک بەڵێن، چونکە بەڵێنی زۆرمان بیستووە".
لەکۆتایی راگەیەنراوەکەدا مامۆستایان داواکاریەکانیان بەم شێوەیە خستووەتە روو، کە داوای: "دەرھێنانی وەزارەتی پەروەردە لەسیستەمی زۆرەملێی پاشکەوت" لەگەڵ "دیاریکردنی شێواز و میکانیزمی ھەڵگرتن و پێدانەوەی پاشەکەوت و مووچە نەدراوەکان" لەگەڵ "پێدانی مووچەی مانگانە لەکاتی دیاری کراوی خۆیدا".
ھاوکات لەخۆپیشاندانەکەدا، چەتری ناڕەزایەتیەکانی خەڵک راگەیەنراوێکی بڵاوکردەوە و تیایدا دەڵێت: " ئێمە بۆجاری چەندەمینە دێینەوە سەرشەقام و ئاشتیانە و ھێمنانە تکا دەکەین لەحکوومەت و دەڵێین 'وەرنەوە ھۆش خۆتان و لەمە زیاتر گەل تووشی نەھامەتی و برسێتی مەکەن چونکە باوەڕ بەپاساوەکانتان ناکەین' ".
ھەروەها رایدەگەینن: "دڵنیاتان دەکەین کە گەل ھەرگیز لەداوا رەواکانی پاشگەز نابێتەوە و بەردەوام دەبێت بەھەموو شێوازێکی مەدەنیانە، لێرەوە داوا لەھەموو چین و توێژەکانی پارێزگاکەمان دەکەین یەکدەنگ و یەک ریز بێنە سەرجادە و پێکەوە داواکاریەکانمان بخەینەڕوو".
لەکۆتایی راگەیەنراوەکەشیاندا چەند داواکاریەکیان خستووەتە روو کە بریتین لە: "کۆتاییھێنان بەسیستەمی پاشەکەوتی مووچەی فەرمانبەران" و "ئاشکراکردنی سەرجەم سەرچاوە داراییەکان و چۆنیەتی خەرجکردنیان"، "ھەڵوەشاندنەوەی سەرجەم ئەو باجە داراییانەی لەساڵی ٢٠١٥وە خراونەتە سەرھاووڵاتییان" و "ھەڵوەشاندنەوەی بڕیاری لێسەندنی ١٠٠ ھەزار دینار لەخوێندکاران" لەگەڵ " گەڕاندنەوەی شکۆ بۆ دادگا و سەروەری یاسا".