ئاوارەبوونی ٢٦ هەزار كەس لە بەشی راستی مووسڵ

نەینەوا ــ AA

وەزیری كۆچ و كۆچبەرانی عێراق، جاسم محەمەد رایگەیاند كە لە سەرەتای ئۆپەراسیۆنی كۆنتڕۆڵكردنەوەی بەشی راستی مووسڵ تا ئێستا، ٢٦ هەزار هاووڵاتی مەدەنی لە بەشی راستی شارەکە ئاوارە بوون.

لە بەیاننامەیەكدا وەزیری كۆچ و كۆچبەرانی عێراق، جاسم محەمەد ئاماژەی بەوە داوە كە لەمیانی ١٠ رۆژی رابردوودا تا ئێستا، تیمەكانی مەیدانی وەزارەتەكەیان پێشوازیان كردووە لە ٢٦ هەزار هاووڵاتی مەدەنی كە بەهۆی شەڕ و پێكدادانەكانەوە لە بەشی راستی مووسڵ ئاوارە بوون.

وەزیری كۆچ و كۆچبەرانی عێراق راشیگەیاندووە كە تیمەكانی وەزارەتی كۆچ و كۆچبەران هاوكاری و یارمەتی مرۆیی وەك خۆراك و تەندروستییان پێشكەشی ئەو ئاوارانە كردووە كە لە كەمپەكانی، جدعە، فڕگە، حاجی عەلی لە ناحیەی گەیارە و هەروەها لە كەمپی حەمام عەلیل نیشتەجێ كراون.

جاسم محەمەد دوایین ئاماری ژمارەی ئاوارەكانی شاری مووسڵ و قەزای حەویجەی خستە ڕوو و رایگەیاند كە ژمارەی ئاوارەكانی مووسڵ و حەویجە گەیشتووەتە، ٢٥١ هەزار كەس.

لای خۆیەوە ئەندامی كۆمەڵەی مانگی سووری عێراقی، ئەیاد رافد بەئاژانسی ئانادۆڵوی رایگەیاند كە تیمی وەزارەتی كۆچ و كۆچبەران یەكەم كاروانی ئاوارەكانی بەشی راستی مووسڵ كە ژمارەیان ٦٠٠ كەسە لە كەمپی ناحیەی عەلیل نیشتەجێ كرد.

ئەیاد رافد ئاماژەی بەوەشدا كە تیمی وەزارەتی كۆچ و كۆچبەران و رێكخراوەكانی مرۆیی ناوخۆیی و نێودەوڵەتی، هاوكاری و یارمەتی مرۆیی وەك خۆراك و تەندروستی پێشكەش بەو ئاوارانە كردووە.

هاوكات ئەندامی لیژنەی كۆچ و كۆچبەران لە ئەنجوومەنی نوێنەرانی عێراق، نەهلە حوسێن بەئاژانسی ئانادۆڵوی راگەیاند كە ژمارەی ئاوارەكان لەژێر كۆنتڕۆڵدایە و هەوڵە مرۆییەكانیش كە بۆ پێشكەشكردنی هاوكاری و یارمەتی مرۆیی بۆ ئاوارەكان خراونەتە گەر، تا ئێستا زۆر باشە.

نەهلە حوسێن جەختی لەسەر گرنگی گەیاندنی خزمەتگوزارییەكان بۆ گەڕە كۆنتڕۆڵكراوەكانی مووسڵ کردەوە بۆ ئەوەی خێزانە ئاوارەكان بتوانن بگەڕێنەوە سەر ماڵ و حاڵی خۆیان.