هۆشیار عەبدوڵا: "پرۆسەی رزگاركردنەوەی مووسڵ ئاسان نابێت"

سەرۆكی فراكسیۆنی گۆڕان لە پەرلەمانی عێراق هۆشیار عەبدوڵا لە كۆنگرەیەكی رۆژنامەوانیدا لە شاری سلێمانی و لە وەڵامی پرسیارێكی پەیامنێری ئاژانسی ئانادۆڵو لەبارەی دەنگۆی گۆڕانكاری كابینەكەی عەبادی و پڕۆسەی رزگاركردنەوەی مووسڵەوە دوا.

لەبارەی گۆڕانكاری كابینەكەی عەبادی و ئەگەری گۆڕینی وەزیرەكەی گۆڕان (وەزیری كۆچ و كۆچبەران) سەرۆكی فراكسیۆنی گۆڕان گوتی: "ئەو گۆڕانكارییانە بەشێوەیەكی گشتی تائێستا روخسار و رێكارەكانی دیار نییە و ئەوەندەی هەیە پێشتر حەیدەر عەبادی داوای گۆڕانكاری وەزاری كردووە و لە گوتارێكدا و لە كۆبوونەوەی سەرۆكی فراكسیۆنەكانیشدا نیگەرانی خۆی نیشانداوە لەوەی هەندێك لەوەزارەتەكان چالاك نین و پێویستی بە خەڵكی تەكنۆكرات هەیە، ئەوەش جیاوازی بۆچوونی لە نێوان فراكسیۆنەكان دروست كردووە".

هۆشیار عەبدوڵا گوتی: "هەندێك لە كوتلەكان پێیان وایە ئەگەر بابەتەكە تەكنۆرات بوون بێت پێویستە عەبادی خۆشی بگرێتەوە، وەك بزووتنەوەی گۆڕان ئامادەیی ئێمە بۆ خزمەتە و زۆر مەبەستمان نییە كە وەزارەتەكەی ئێمە بەر ئەو گۆڕانكارییە دەكەوێت یان نا و تائێستا بەرەسمی هیچ شتێكمان پێنەداوە".

هۆشیار عەبدۆڵا كە هاوكات ئەندامی لیژنەی ئاسایش و بەرگری پەرلەمانی عێراقە لەبارەی پرسی رزگاركردنەوەی مووسڵەوە دواو گوتی: "مووسڵ پرسێكی گوماناوییە و كۆمەڵێك لایەنی ئێجگار گەورەی هەیە و كۆمەڵێك بەربەستی گەورەی لەبەردەمدا هەیە، ئەوانەی كە كاریگەرن لە پرسی رزگاركردنەوەی مووسڵدا چەند لایەنێكە گرنگترینیان لایەنی ئەمریكییە دواتر حكوومەتی هەرێمی كوردستان و حكوومەتی عێراقییە".

ئەو هەروەها گوتی: "پرۆسەكە ئاسان نییە و بە ئاسانی دەست پێناكات، ئەو كێشە و بەربەستانەی هەیە لە بەردەم پڕۆسەكەدا و رێگرن لەبەردەم پرۆسەكەدا كێشەی تائیفی و ناكۆكی تائیفییە، هەروەها لە ناو مووسڵدا زیاتر لە یەك ملیۆن هاووڵاتی مەدەنی و زیاتر لە هەشت هەزار تیرۆریست لە شارەكە هەیە و بەرگری لە مووسڵ دەكەن".