سلێمانی.. مزگەوتى بیلالى حەبەشى ئەکبەر کرایەوە

بەئامادەبوونى نوێنەرانى حکوومەت و مامۆستایانى ئایینى شارى سلێمانى لە رێوڕەسمێکدا، مزگەوتى بیلالى حەبەشى ئەکبەر کە لەلایەن خێرخوازێکەوە نۆژنکرابوویەوە کرایەوە. لاى خۆیانەوە مامۆستایانى ئایینیش لەخودا داوایان کرد کە پێشمەرگەى کوردستان پیارێزێت سەرکەوتوویان بکات و راشیانگەیاند مزگەوت شوێنى تەبایى و ئاشتییە بۆیە پێویستە لایەنەکانى هەرێمى کوردستانیش لەناوخۆیاندا تەبابن و ئاشتى و ئارامى بۆکوردستان بەرقەرار بکەن".
لاى خۆیەوە بەرپرسى لقى سلێمانى یەکێتى زانایانى کوردستان، نەجمەدین قادر لە رێوڕەسمی کردنەوەى مزگەوتەکە رایگەیاند "بەناوى بەڕێوەبەرایەتى گشتى ئەوقاف و یەکێتى زانایانى ئایینى کوردستانەوە دەست خۆشى خۆمان ئاراستەى ئەو خێرخوازە دەکەین کە هەستاوە بە نۆژەنکردنەوەى ئەم مزگەوتە کە ئەمەش کارێکى پیرۆزە لەلاى خوداى گەورە".
گوتیشى: "مزگەوت رۆڵێکى گرنگى بینیوە لە خزمەتکردنى کۆمەڵگا و خزمەتکردنى منداڵەکانمان وە خزمەتێکى زۆرى کردووە لە رابردوودا و تاکو ئێستاشى لەگەڵ بێت شوێنێک بووە بۆ بەرخۆدانى هەموو پیرۆزییەکانى نەتەوەکەمان و پاراستنى دەستکەوتەکانمان کارى کردووە بۆ کارى چاکەکردن و هۆشیارکردنەوەى خەڵکى لە کارى خراپەکردن".
نەجمەدین راشیگەیاند "پێویستە کاربەدەستان و زانایان بە هەماهەنگى لەگەڵ یەکتر کاربکەن بۆ پاراستى خاکى کوردستان و پاراستى ئەو دەستکەوتانەکەى کە فەراهەم هێنراون پێویستیشە بەهەموومانەوە دەست خۆشى لەو کەسانە بکەین کە کاردەکەن بۆ کردنەوە و نۆژەنکردنەوەى مزگەوتەکان و هاوکاریان بین تاکو بتوانن زیاتر خزمەت بکەن".

بەرپرسى لقى سلێمانى یەکێتى زانایانى ئایینى کوردستان، لاى خۆیەوە داواى لە خودا کرد کە هاوکارى پێشمەرگە بکات و سەربەرزیان بکات بۆ پاراستنى خاکى کوردستان تاکو کوردستان رزگارى بێت لەدەست ئەوگرووپانە و داواشى لە لایەنەکانى هەرێمى کوردستان کرد کە یەک ریز و تەبا بن بۆ دەربازبوونى کوردستان لەم قەیرانەى کە رووبەڕووى بووەتەوە".
لاى خۆشیەوە سەرۆکى ئەنجوومەنى پارێزگاى سلێمانى، هەڤاڵ ئەبوبەکر لەو مەراسیمەدا رایگەیاند "نۆژەنکردنەوەى ئەم مزگەوتە و کردنەوەى بە شێوازێکى نوێ جێگەى دەست خۆشى و پێزانینە چونکە مزگەوت خزمەتێکى بەرچاوکى کۆمەڵگاى کوردى کردووە لە رووى ئادابە کۆمەڵایەتیەکانەوە بۆیە پێویستە زیاتر لەخزمەتى مزگەوت و ماڵى خودادابین وەک ئەنجوومەنى پارێزگاى سلێمانى سوپاسى ئەو خێرخوازە دەکەین کە هەستاوە بە نۆژەنکردنەوەى ئەم مزگەوتە".
هەڤاڵ گوتیشى: "ئەو پێشمەرگانەى کە لە ئێستادا لە بەرەکانى جەنگن خاکى کوردستان ئەپارێزن وەک مزگەوت وایە ئەو پزیشکەى کە لە نەخۆشخانەکەیدا خزمەتى نەخۆش دەکات و چارەسەرى بۆ دەکات وەک مزگەوت وایە و هەرکەسێک لە هەرشوێنێک خزمەتێک بکات بە خاکەکەى ئەوا وەک ئەوە وایە مزگەوتێکى دروست کردبێت یان نۆژەنى کردبێتەوە بۆیە دەبێت وا تێبگەین کەمزگەوت بۆ ئەوە دروست کراوە کە بیسەلمێنین کە ئێمە تەباین لەناو خۆماندا و هیچ جیاوازییەک نییە لە نێوان کەسەکاندا".

سەرۆکى ئەنجوومەنى پارێزگاى سلێمانى راشیگەیاند "پێشنیاز دەکەم بۆ لایەنە پەیوەندیدارەکان بەوەى کە بۆ لەمەو دوا ناوى مزگەوتەکانمان بەناوى ئەو پێشمەرگە قارەمانانەوە بێت کە لەبەرەکانى جەنگ شەهید دەبن بۆ پاراستنى خاکى کوردستان بۆیە پێویستە لەمەو دوا هەر مزگەوتێک دروستکرا بەناوى پێشمەرگەیەکى شەهیدەوەبێت وەک وەفایەک بۆ ئەو پێشمەرگە قارامانانە".
خاوەنى پرۆسەی نۆژەنکردنەوەى مزگەوتەکە حاجى محمەد ئاڵەت بۆ رۆژنامەنووسان گوتى: "زۆر بەختەوەر و شادوومانم کە توانیم ئەم مزگەوتە نۆژەن بکەمەوە ئەمڕۆ لەم مەراسیمەدا بکرێتەوە بە رووى موسڵمانانى شارى سلێمانیدا".

ئەو گوتىشی: "بیرۆکەى نۆژەنکردنەوەى ئەم مزگەوتە بەوەبوو رۆژێک هاتمە ئەم مزگەوتەوە نوێژم تێیدا کرد بینیم مزگەوتەکە تکەى باران ئەکات منیش زۆر دڵ تەنگ بووم بەوەى ئەم مزگەوتە تکەى باران بکات بۆیە لەو کاتەوە بڕیارم دا بە نۆژەنکردنەوەى ئەم مزگەوتە بۆیە لە 21-3-2013 دەست کرا بەنۆژەنکردنەوەى تاکو ئێستا تەواوبووە رادەستى وەزارەتى ئەوقاف کراوە".

حاجى محمەد داوای کرد کە خەڵکى رووبکەنە مزگەوتەکان لەخوداى باڵادەست بپارێنەوە کە کوردستان بپارێزرێت و پێشمەرگەکانى کوردستان سەربکەوون ئاشتى و تەبایى لە نێوان لایەنەکان بەرقەراربێت و تاکو ئاشتى و ئارامى باڵ بکێشێت بەسەر هەرێمى کوردستاندا".