БЕЛГРАД (АА) - Србија е една од најнапредните земји во процесот на пристапување во Европската унија (ЕУ) и на неа е да ја избере брзината на пристапување, изјави денес претседателката на Европската комисија Урсула фон дер Лајен по состанокот со српскиот претседател Александар Вучиќ, известува Анадолу.

Во своето обраќање пред медиумите, Фон дер Лајен рече дека партнерството меѓу Србија и Европската унија станува се посилно, и дека ЕУ е првиот трговски партнер и инвеститор на Србија.

Напредокот на Србија на европскиот пат и почетокот на имплементацијата на Планот за раст на Западен Балкан беа во фокусот на разговорите меѓу Вучиќ и Фон дер Лајен.

„Планот за раст треба да ги приближи економиите од Западен Балкан до нашата и постепено да го интегрира регионалниот пазар со единствениот европски пазар. Принципот е многу едноставен. Ги отвораме вратите на единствениот пазар на Европската унија во одредени сектори за српските компании, а за возврат треба да се спроведат одредени реформи заради фер услови на пазарот“, рече Фон дер Лајен.

Таа им честиташе на Србија и нејзиниот претседател за одлична работа кога е во прашање реформската агенда.

„Тоа е одлична реформска агенда што е подготвена. Сега треба да почнеме да го имплементација на планот и 1,6 милијарди евра што Србија ќе ги добие во рамкитена планот. На добар пат сте од следната година да станете дел од единствената зона за плаќање во евра, што значи дека трансферите на пари меѓу Србија и Европската унија ќе бидат побрзи, побезбедни и поевтини, што ќе биде од корист и за граѓаните и за економијата“, рече Вон дер Лајен.

Говорејќи за ископувањето на критичните суровини, Фон дер Лајен истакна дека граѓаните на Србија можат да бидат „сигурни дека ЕУ ќе ја почитува и ќе ја зачува прекрасната природа“ на земјата.

„Ќе соработуваме со локалните заедници, бидејќи тоа е стандардот што го користиме во Европската унија, а со оглед на тоа дека сте идна членка, секако дека истото тоа ќе го правиме заедно и тука. Тоа е просперитетна и одржлива иднина за следните генерации “, рече претседателот на ЕК.

Фон дер Лајен се осврна и на Инвестицискиот план за Западен Балкан, додавајќи дека продолжуваат да работат на големи проекти кои се фокусираат на чиста енергија и дигитална транзиција.

„Вие и понатака сте силно посветени на европската иднина во време на конфликти, војни и немири. Да се ​​биде дел од Европската унија, односно членка на Европската унија, е ветување за мир и просперитет што можеме да ги дадеме заедно. Србија веќе е една од најнапредните земји во процесот на пристапување. Се посветивте да спроведете реформи, особено во областа на владеењето на правото и демократијата“, рече Фон дер Лајен, додавајќи дека токму во овој дух ЕУ работи на отворање на кластерот 3.

Во тој контекст, таа додаде дека на земјите кандидати е „да ја изберат брзината и квалитетот на патот кон пристапување во Европската унија“.

„Одлуката што ја дефинира брзината на интеграцијата во ЕУ и пристапувањето кон семејството е на земјите кандидати. Ја следам Србија пет години и видов напредок и очекувам дека успешно ќе одиме напред“, порача Фон дер Лајен.

Вучиќ истакна дека имал многу долг, крајно отворен и искрен разговор со Фон дер Лајен и додаде:

„Секако дека има работи за кои Европската унија ја критикува Србија, но Фон дер Лајен секогаш била подготвена да ја сослуша и нашата страна“.

„Сѐ додека јас сум претседател на Републиката, нема да ги менуваме главните цели на нашата надворешна и внатрешна политика. Тоа значи дека нашиот европски пат и нашето застапување за европска Србија е од клучно значење за нашиот напредок, дека Србија е посветена да работи на тој пат и дека се надеваме на резултати“, рече Вучиќ.

Тој додаде дека разговарале за геополитичката ситуација и дека ја информирал за политиката на Србија, од почитување на Повелбата на Обединетите нации и меѓународниот рамноправен поредок. Тој истакна дека украинските власти му го дале согласност на амбасадорот на Србија за отворање на амбасадата во Киев.

„Разговаравме за Косово и Метохија, и за разлика од некои други, нема да ја искористам оваа можност да ја префрлам вината на некој друг, ниту да ја заморам претседателката Фон дер Лајен пред јавноста со она што го зборував. Детално и темелно ја презентирав позицијата на Србија и зборував за неопходноста од компромис, разговори и иднината на целиот регион“, рече Вучиќ.

Тој посочи дека во трговијата на стоки и услуги со Европската унија во 2023 година имале размена од речиси 51 милијарда евра и оти веруваат дека 2024 година ќе биде уште подобра.

Тој наведе дека разговарале за реформската агенда, велејќи дека знаат што треба да направат по прашањето на владеењето на правото, особено во однос на судството, судењето и навремено завршувањето на постапките во соодветен рок.

Вучиќ истакна дека за Србија исклучително се важни инфраструктурните проекти кои ги работат со ЕУ, благодарение на сите грантови што ги добиле од ЕУ и парите што ќе ги добијат во рамките на Планот за раст од Европа.

„Овој пат можам да кажам дека се надевам дека ќе го отвориме кластерот 3 до крајот на годината, што ќе биде важно и тоа ќе биде значаен сигнал дека Србија дека напредува на својот европски пат. Важно е во меѓувреме да го чуваме мирот, иако јас, како што знаете, што се однесува до светската ситуација, не сум преголем оптимист“, рече претседателот на Србија.

Тој додаде дека Фон дер Лајен побарала од Србија многу поголема усогласеност со надворешно-политичката декларација на ЕУ, усогласеност по некои други прашања и наведе дека знаат и кои се барањата и кои се очекувањата.

Претходно, претседателот на Србија и формално ја пречека претседателката на ЕК пред „Палата Србија“. Приемот беше организиран со највисоки државни и воени почести, по што следеше тет-а-тет разговор меѓу Вучиќ и Фон дер Лајен и пленарни разговори на делегациите на Србија и ЕУ.

Фон дер Лајен пристигна во Белград од Босна и Херцеговина, а претходно ги посети Албанија и Северна Македонија. Од Белград утре заминува за Косово, а регионалната турнеја ја завршува со посета на Црна Гора истиот ден.