Gorana Jakovljevic
11 Април 2022•Ажурирај: 12 Април 2022
САРАЕВО (АА) - Владата на Обединетото Кралство ги санкционираше членот на Претседателството на Босна и Херцеговина, Милорад Додик, и претседателот на босанскиот ентитет Република Српска, Жељка Цвијановиќ, поради нивното нарушување на легитимитетот и функционалноста на Босна и Херцеговина, соопшти денеска британската Амбасада во Босна и Херцеговина, јавува Агенција Анадолија (АА).
„Британските санкции значат дека Додик и Цвијановиќ нема да можат да патуваат во Обединетото Кралство или да користат или пристапат до кој било имот што можеби го имаат во Обединетото Кралство“, се вели во соопштението на британската Амбасада во Босна и Херцеговина.
„Овие двајца политичари намерно го поткопуваат тешко стекнатиот мир во Босна и Херцеговина. Охрабрени (од рускиот претседател Владимир Путин), нивното непромислено однесување е закана за стабилноста и безбедноста низ Западен Балкан. Со овие остри санкции покажуваме дека непријателите на мирот ќе бидат повикани на одговорност“, изјави британската министерка за надворешни работи, Лиз Трас.
Во соопштението се додава дека тоа не се санкции против Република Српска или нејзините граѓани, туку дека се насочени кон две лица кои се однесувале неодговорно на своите позиции.
Станува збор за првите санкции воведени во рамките на режимот на санкции за Босна и Херцеговина.
„Охрабрени од руското поткопување на меѓународниот систем заснован на правила, и двајцата ги искористија своите позиции за да ја поттикнат де факто сецесијата на Република Српска, еден од двата ентитета на Босна и Херцеговина, во директна спротивност со Уставот на земјата“, соопшти британското Министерство за надворешни работи, Комонвелт и развој (FCDO).
Се додава дека Милорад Додик презел активности за повлекување на Република Српска од клучните државни институции, користејќи се со поделба, опасна, националистичка реторика, поткопување на домашниот и регионалниот мир и поттикнување етничка омраза и негирање на геноцидот.
Во октомври 2021 година, Жељка Цвијановиќ ја искористила својата функција за да донесе закони во Република Српска со кои се настојуваше да се префрлат државните надлежности на ентитетско ниво. Нагласено е дека таа јавно ги величела воените злосторници и го негирала геноцидот во Сребреница.
