ПРИШТИНА (АА) - Улиците на Приштина, главен град на Косово, се преполнети со отпад поради штрајкот на вработените во претпријатието „Чистота“, кои од понеделникот не го земаат ѓубрето од контејнерите, јавува Анадолу.
Во повеќето населби веќе два дена не се отстранува отпадот поради штрајкот на работниците на регионалното претпријатие „Чистота“, кои бараат зголемување на платите. Работниците што примаат 330 евра месечно бараат зголемување за најмалку 70 евра.
За да се надмине оваа состојба, општинските службеници доцна синоќа ги ангажираа работниците на компанијата „Хортикултура“ за отстранување на отпадот.
„Собраниот отпад се отстранува и сите локации околу контејнерите се мијат со вода“, изјави градоначалникот на општина Приштина, Перпарим Рама.
Сепак, околу контејнерите сѐ уште има многу отпад, особено во населбата Тофане. Во таа населба, освен главните контејнери, преполни се и контејнерите пред ОУ „Мето Бајрактари“.
Денес регионалното претпријатие „Чистота“ соопшти дека нивни екипи излегле на терен за да продолжат со собирање и отстранување на отпадот за доброто на граѓаните, со цел да се спречи епидемија. Тие нагласија дека очекуваат во наредните денови да се постигне договор околу барањата на работниците за зголемување на платите.
