Собранието на Косово ја усвои демаркацијата со Црна Гора

ПРИШТИНА (АА) - Собранието на Косово го усвои договорот за демаркација на границата со Црна Гора, јавува Anadolu Agency (AA).

Дури во петтиот обид, Собранието на Косово денес со 80 гласови „за" и 11 „против" успеа да го ратификува Нацрт законот за ратификација на договорот за државната граница меѓу Косово и Црна Гора.

Претходните четири обиди не успеаја, бидејќи пратениците на опозициското движење „Самоопределување“, фрлаа солзавци во пленарната сала.

Поради фрлање на солзавец, полицијата на Косово приведе седум пратеници на партијата, додека Претседателството на Собранието уште седуммина други пратеници на „Самоопределување“, ги исклучи од работата во Собранието.