Русија го ограничи извозот на бензин и дизел

МОСКВА (АА) - Руската Влада денес воведе привремено ограничување на извозот на бензин и дизел со цел да ги стабилизира цените на домашниот пазар, јавува Анадолу.

„Во Русија се воведени привремени ограничувања за извоз на автомобилски бензин и дизел-гориво. Уредбата ја потпиша премиерот Михаил Мишустин. Одлуката е донесена за стабилизирање на цените на горивата на домашниот пазар“, соопшти владината прес-служба преку својата веб-страница.

Се наведува дека ограничувањата „ќе помогнат да се задоволи пазарот на гориво што, пак, ќе ги намали цените за потрошувачите“.

Цените на акциите на бензинот и дизел-горивото во Русија достигнаа рекордно високо ниво во последните месеци.

Според заменик-премиерот Александар Новак, цените растат поради порастот на цените на нафтените деривати на светските берзи и губењето на вредноста на рубљата во однос на американскиот долар.