Sibel Morrow
07 Јули 2022•Ажурирај: 08 Јули 2022
АНКАРА (АА) - Количеството нафта што може да се извлече од наоѓалиштето Чукурова во јужната турска област Адана се очекува да достигне до 8 милиони барели, изјави турскиот министер за енергетика, Фатих Донмез, јавува Агенција Анадолија (АА).
Донмез го посети полето каде што турскиот претседател Реџеп Таип Ердоган на 28 јуни објави дека се откриени нафтени резерви во вредност од 1 милијарда долари.
„Бидејќи бунарите Чукурова-1 со длабочина од 430 метри и Чукурова-2 со длабочина од 368 метри се најплитки во земјата, и инвестициите и трошоците за производство ќе бидат многу ниски“, објасни Донмез.
Дневното просечно производство од овие бунари во раната фаза на развој е 100-120 барели, но Донмез рече дека кога ќе се развие, прогнозата е за околу 7,5-8 милиони барели нафта од ова поле, чија вредност е приближно 1 милијарда долари.
Во врска со економскиот успех на ова наоѓалиште на нафта, Донмез рече дека се планираат повеќе дупчења во осум бунари за да се зголеми вкупниот број на 10 до крајот на годината.
Напорите за дупчење се дел од планот на Владата да ја намали зависноста од скапиот увоз на енергенси.
Донмез потсети дека пред само четири или пет години дневното производство на нафта од страна на државната компанија за дупчење и истражување „Турски петролеум“ (ТПАО) изнесувало 37.000 барели, но дека денес надминува 60.000 барели.
„Во истиот период, додадовме уште 70 милиони барели на нашите вкупни резерви со дополнителни откритија“, рече тој.
„Овие додатоци помогнаа да се ублажи увозот на нафта и гас, кој е многу висок со 92 отсто за нафта и 99 отсто за природен гас“, додаде Донмез.
