Над 500.000 здравствени работници во Турција ја примија првата доза од вакцината

АНКАРА (АА) - Над 500.000 здравствени работници во Турција ја добија првата доза од вакцината против Ковид-19, се соопштува од турското Министерство за здравство, јавува Агенција Анадолија (АА).

Во 14:30 часот по локално време, пребројувањето во живо покажа дека вакцинирани се речиси 520.000 лица.

Лидерот на турската Партија на национално движење (MHP), Девлет Бахчели, ја прими првата доза од вакцината против Ковид-19.

„Се надевам дека ќе се ослободиме од оваа пандемија многу наскоро и ги повикувам сите луѓе да се вакцинираат“, напиша Бахчели на Твитер.

Претседателката на Партијата ИЈИ, Мерал Акшенер, исто така се вакцинира против вирусот.

„Јас се вакцинирав, исто така, со уверување дека партиските лидери треба да го водат нашето општество кон вакцинирање“, напиша Акшенер на Твитер.

Турскиот министер за здравство, Фахретин Коџа, на Твитер им се заблагодари на Бахчели и Акшенер за нивната поддршка на програмата за вакцина.

Турција вчера ја започна масовната кампања за вакцинација против Ковид-19 на здравствените работници во земјата. Турскиот претседател Реџеп Таип Ердоган исто така ја прими првата доза од вакцината против Ковид-19.

Турскиот министер за здравство беше првото лице кое ја прими кинеската вакцина, откако Агенцијата за лекови и медицински производи на Турција (TITCK) ја одобри вакцината „коронавак“ за итна употреба против коронавирусот. По министерот се вакцинираа и членовите на Научно-советодавниот одбор за коронавирусот.

Според податоците собрани од Министерството за здравство, за еден месец во Турција ќе бидат вакцинирани 1,1 милион здравствени работници.

Двете дози од вакцината ќе бидат дадени во интервал од 28 дена. Оние кои оздравеле од вирусот нема да бидат вакцинирани четири до шест месеци по нивното оздравување.

Првата испорака на вакцината против Ковид-19 од три милиони дози, на кинеската компанија „СиноВак Биотех“ (SinoVac Biotech) во Турција стигна на 30 декември.

Турција воведе полициски час во вечерните часови во текот на неделата и викендите како дел од мерките за спречување на ширењето на вирусот.

Оваа недела Ердоган најави дека рестрикциите постепено ќе се попуштаат, бидејќи бројот на нови случаи на Ковид-19 започна значително да опаѓа.

Од декември 2019 година, пандемијата на Ковид-19 одзеде речиси 2 милиони животи во 191 земја и региони низ светот.

Според податоците на американскиот Универзитет „Џонс Хопкинс“ регистрирани се над 93,20 милиони случаи на Ковид-19 низ светот, додека од вирусот оздравеле 51,45 милиони лица.

САД, Индија и Бразил се најтешко погодени земји од вирусот.