Кремљ: Намалувањето во снабдувањето на Украина со оружје од Западот го приближува крајот на конфликтот

МОСКВА (АА) – Намалувањето или целосното запирање на испораките на оружје за Украина од страна на Западот го приближува крајот на конфликтот со Русија, изјави денес портпаролот на Кремљ, Дмитриј Песков, јавува Анадолу.

Песков на редовниот брифинг во Москва истакна дека намалените испораки се должат на недостиг на оружје кај земјите снабдувачи.

Според него, „испразнетите магацини и недостигот на оружје во складиштата“ се причина за оваа промена. Независно од причините, како што рече, „колку помалку оружје ѝ се испорачува на Украина, толку поблиску е крајот на специјалната воена операција“.

Американски медиуми пренесоа дека Министерството за одбрана на САД го суспендирало праќањето ракети за противвоздушна одбрана и прецизно наведувано оружје за Украина поради недостиг на резерви и дека нови испораки не се очекуваат наредните неколку месеци.

Во врска со разговорот меѓу рускиот претседател Владимир Путин и неговиот француски колега Емануел Макрон, Песков изјави дека иницијативата за разговор дошла од француска страна.

Тој додаде дека не станало збор за организирање директна средба меѓу двајцата лидери и дека телефонскиот формат е доволен за размена на ставови во моментов.

На прашањето дали Макрон покажал подготвеност за договарање мир под услови што ги одразуваат промените на теренот, Песков одговори негативно.

„Не, тој не прати сигнали. Беа разменети мислења, но прилично темелно. Тоа беше добра можност да ги пренесат меѓусебните ставови“, рече тој.

Песков, исто така, информираше дека Кремљ досега не добил барање за директна комуникација со Путин од Германија или Велика Британија.