Лекари без граници: „Хуманитарната и медицинската состојба во Газа достигна најлоша фаза“

ЖЕНЕВА (АА) - Газа ја достигна најлошата хуманитарна и медицинска состојба што може да ја замислиме, со пациенти насекаде и без соодветни лекови за нивно лекување, изјави менаџерот за медицински активности на Лекари без граници (MSF) во Појасот Газа, известува Анадолу.

„Општата состојба во Појасот Газа е многу лоша. Здравствената состојба во Појасот Газа е катастрофална“, изјави Ахмад Абу Варда, менаџер за медицински активности во болницата „Насер“ во Кан Јунис, за Анадолу.

Тој објасни дека болниците во Газа, кои сè уште делумно се оперативни, се борат да се справат со големиот број пациенти, празнините во услугите и недостигот од медицински материјали.

„Пациентите се насекаде, во ходниците и на земја, дури и без болнички кревет. Пациентите мора да донесат и душеци од дома за да бидат примени во болниците и да ги добијат услугите“, рече тој.

Варда го нагласи широко распространетиот недостиг на медицински материјали во Газа, истакнувајќи дека и повредените и хроничните пациенти не се во можност да добијат лекови.

„Се бориме со сите аспекти на здравствениот систем во Појасот Газа денес; секој ден е полош од претходниот. Секој во здравствениот систем во Појасот Газа се бори“, нагласи тој.

Истакнувајќи ја тешката состојба во болницата „Насер“, најголема функционална болница во Појасот Газа, Варда рече дека таа прима три-четири пати повеќе пациенти отколку што може.

- „Не може ниту да земете здив во одделот за итни случаи“

„Одделот за итни случаи во болницата 'Насер' не запира. Приливот на пациенти не запира. Значи, доколку одите во одделот за итни случаи, внатре не може ниту да земете здив“, рече Варда и додаде:

„Може да почувствувате мирис на крв насекаде во одделот за итни случаи на болницата 'Насер'.“

Израелската наредба за евакуација на Газа тој ја опиша како трагична, истакнувајќи дека голем дел од населението живее таму и нема каде да оди на друго место.

„Сега, со тие наредби за евакуација и зголемувањето на експлозиите и таргетирањето таму, тоа става поголем товар врз медицинските тимови и врз населението“, рече тој, нагласувајќи дека жителите се „очајни“ и дека е неприфатливо Израел да издаде наредба за евакуација за целиот град кога нема безбедно место за нив.

Варда додаде дека нападите врз Газа продолжуваат, а пациентите не знаат каде да одат.

„Дури и повредените луѓе не знаат каде да одат“, рече тој, истакнувајќи дека многу пациенти мора да чекаат со недели или дури месеци за хируршка интервенција што им е потребна поради тековните напади.