Претседателот на Узбекистан потпиша декрет со кој се воведува доживотен затвор за педофилија

ИСТАНБУЛ (АА) - Претседателот на Узбекистан, Шавкат Мирзијојев, потпиша декрет со кој, меѓу другото, се воведува казна доживотен затвор за педофилија, јавува Анадолу.

Потпишувањето на декретот беше соопштено вчера од узбекистанското Претседателство откако Мирзијоев ги разгледа предлозите и иницијативите насочени кон дополнително зајакнување на системот за заштита на правата на жените и децата на состанокот на меѓуресорскиот совет.

Во соопштението се наведува дека разгледувањето опфатило и нови мерки за спречување случаи на вознемирување и насилство врз жените и децата.

За овие прашања, како што се истакнува, повеќепати се дискутирало на највисоко ниво, при што им биле доделени конкретни задачи на органите за спроведување на законот и на други надлежни институции.

„За координација на напорите во оваа област формиран е меѓуресорски совет, кој доби задача во краток рок да изготви практични предлози“, се наведува во соопштението, во кое се додава дека на состанокот биле разгледани иницијативите подготвени врз основа на предлозите од јавноста, експертските препораки и најдобрите меѓународни практики.

Меѓу разгледаните иницијативи биле и предлог-мерките за заострување на казните за сексуално вознемирување преку воведување административен притвор до пет дена, како и воспоставување казна за педофилија до доживотен затвор.

„Одобрувајќи ги предложените иницијативи, шефот на државата потпиша соодветен декрет и им наложи на надлежните официјални претставници да го информираат населението за новите мерки“, се додава во соопштението.