„Уништени се 92 % од домовите во Газа од израелската војна“, објави УНРВА

ИСТАНБУЛ (АА) - Како последица на војната на Израел уништени се 92 % од палестинските домови во Појасот Газа, соопшти денес Агенцијата на ОН за палестински бегалци (УНРВА), јавува Анадолу.

„Семејствата во Газа се соочуваат со незамисливо уништување. Според извештајот на Кластерот за заштита, 92 % од домовите се уништени или оштетени“, се наведува во соопштението на УНРВА.

Агенцијата истакна дека илјадници луѓе повеќепати биле протерани од своите домови и дека во Газа е речиси недостапно засолниште.

Од 2 март израелските власти ги држат затворени граничните премини со Газа за храна, медицински и хуманитарен материјал, со што дополнително се влошува веќе катастрофалната хуманитарна состојба, се предупредува во владините извештаи, како и од организациите за човекови права и меѓународните тела.

Во неделата израелската армија започна нова, масовна копнена офанзива во делови на веќе уништениот регион.

Израелската армија спроведува брутална офанзива против Газа од октомври 2023 година, во која се убиени повеќе од 53.300 Палестинци, повеќето од нив жени и деца.

Минатиот ноември Меѓународниот кривичен суд издаде налози за апсење на Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел, исто така, се соочува со случај за геноцид пред Меѓународниот суд на правдата поради својата војна во енклавата.