Бајден: Има индикакции дека Путин отпуштил или ставил во притвор некои од неговите советници

ВАШИНГТОН (АА) - Рускиот претседател Владимир Путин изгледа дека е изолиран, а се чини дека доказите покажуваат на тоа дека тој ги казнил високите советници за лошиот воен настап на Москва во Украина, изјави американскиот претседател Џо Бајден, јавува Агенција Анадолија (АА).

Бајден рече дека „има одредени индикации“ дека Путин или целосно отпуштил некои од неговите советници или ги ставил во домашен притвор, но рече дека сè уште не сака да говори за тоа поради недостиг на цврсти докази.

Коментарите дојдоа еден ден откако САД ги декласифицираа разузнавачките информации што укажуваат на тоа дека Путин не е свесен за лошите резултати на руската војска во Украина, како и за значителните оптоварувања што се наметнуваат на руската економија со санкциите предводени од Западот.

Белата куќа соопшти дека има информации дека „Путин се почувствувал излажан од руската војска“, што, како што рече, резултирало со постојана тензија меѓу Путин и неговата војска.

Портпаролката на Белата куќа, Кејт Бедингфилд, за новинарите изјави дека одлуката на Русија да ја нападне Украина е стратешка грешка.

„Значи, сè појасно е дека војната на Путин е стратешка грешка што ја остави Русија послаба на долг рок и сè поизолирана на светската сцена“, додаде таа.

Војната меѓу Русија и Украина, која започна со рускиот напад на 24 февруари, предизвика меѓународна осуда, доведе до финансиски санкции против Москва и поттикна затворање на светски компании во Русија.

Најмалку 1.232 цивили се убиени, а 1.935 се ранети во војната на Русија во Украина, според проценките на Обединетите нации, бројки што најверојатно ќе бидат многу поголеми.

Според Агенцијата за бегалци на ОН, повеќе од 4 милиони Украинци побегнале во неколку европски земји, а милиони се раселени во земјата.