Бугарската Влада планира да го намали бројот на руски дипломати во Софија

СОФИЈА (АА) - Бугарија планира да го намали бројот на руски дипломати кои работат во Софија, пренесува Агенција Анадолија (АА).

Откако ескалираа тензиите во билатералните односи по одлуката на Русија да ја прекине испораката на природен гас за Бугарија на 26 април, премиерот Кирил Петков соопшти дека Бугарија планира да го намали бројот на руските дипломати, кој моментално брои 114, во Софија.

Премиерот Петков во изјавата за медиумите рече: „Како може бројот на дипломати што ја претставуваат руската дипломатска мисија да биде 114? Што направија овие 114 луѓе во корист на нашите билатерални односи и за да го спречат прекинот на снабдувањето со природен гас во нашата земја? Навистина се прашувам што прават овие луѓе во Бугарија.“

Наведувајќи дека нема еквивалентност во дипломатското претставување помеѓу двете земји, Петков нагласи: „Ќе дадам предлог темелно да се процени состојбата на овие луѓе и да се бара посиметрична застапеност меѓу Русија и Бугарија. Во моментов, во Бугарската амбасада во Москва работат 10 лица.“

Повеќе од 120 руски дипломати беа прогласени за персона нон грата во земјите на Европската Унија (ЕУ) по нападот на администрацијата на рускиот претседател Владимир Путин врз Украина пред 65 дена.

- Студени ветришта во односите Бугарија - Русија

Во период кога студени ветришта дуваат во односите Бугарија - Русија, руската амбасадорка во Софија, Елеонора Митрофанова, на официјалната веб-страница на Амбасадата објави тешки навреди против Бугарија по повод Националниот ден на независноста од Османлиската Империја што се одбележува во земјата на 3 март.

Бугарија издаде протестна нота до Русија „поради недипломатскиот стил на Митрофанова“. На 8 март 10 руски дипломати кои работат во Софија беа прогласени за персона нон грата со образложение дека „дејствувале против нивниот дипломатски статус“.

Потоа, на 24 март, московскиот амбасадор Атанас Кристин беше повикан во Софија на консултации.

На почетокот на месецов, по предлог на бугарската Државна агенција за национална безбедност (DANS), уште еден дипломат беше протеран поради шпионажа.

Русија, како одговор на мерките на Бугарија, го намали бројот на дипломати на 10 во Бугарската амбасада во Москва, откако протера некои дипломати.