Во близина на шпанскиот брег спасени 14 лица по потонување на руски товарен брод

МОСКВА (АА) - Четиринаесет лица се спасени откако руски товарен брод потона во близина на шпанскиот брег по експлозија во просторијата на моторот, соопшти денес Центарот за состојби и кризи на руското Министерство за надворешни работи, пренесува Анадолу.

„Рускиот товарен брод 'Урса мајор' (сопственост на СК-ЈУГ ДОО) потона во меѓународните води на Средоземното Море по експлозија во просторијата на моторот. Од 16 члена на екипажот (граѓани на Руската Федерација), 14 лица се спасени (однесени од спасувачката служба во пристаништето Картагена, Мурсија), а двајца се исчезнати“, соопшти Центарот преку Телеграм.

Руското Министерство за транспорт и дипломатските мисии внимателно ја следат ситуацијата и се подготвени да ја дадат сета потребна помош, се вели во соопштението.

Шпанските медиуми јавија дека руски брод потонал во меѓународните води меѓу шпанската автономна заедница Мурсија и Алжир.


Се наведува дека бродот тргнал од Санкт Петербург пред околу две недели и пловел кон пристаништето Владивосток, каде што требало да пристигне на 22 јануари.