Ayhan Şimşek
18 Јануари 2021•Ажурирај: 18 Јануари 2021
БЕРЛИН
Германскиот министер за надворешни работи, Хеико Мас, денес повика на дијалог ориентиран кон решение меѓу Турција и Грција за да се решат споровите меѓу двете земји и да се намалат тензиите во Источниот Медитеран, јавува Агенција Анадолија (АА).
Во изјавата што ја даде во Берлин пред да отпатува во Анкара за преговори со неговиот турски колега подоцна во текот на денот, Мас изјави дека Германија ги поздравува неодамнешните дипломатски иницијативи на Турција и очекува овој позитивен момент да продолжи.
„Најавата од страна на Турција и Грција дека ќе ги продолжат истражувачките разговори, што беа прекинати од 2016 година, е прв важен чекор“, рече тој.
„За време на претседателството на Германија со ЕУ во последните шест месеци, ние вложивме силни напори за продолжување на директните разговори меѓу Турција и Грција. Почетокот на овие разговори сега нуди реални шанси за трајно деескалирање во Источниот Медитеран“, додаде тој.
Мас рече дека Турција не само што дала позитивни изјави во врска со дијалогот, туку дека исто така презела конкретни чекори во последните неколку недели за да придонесе за деескалација во регионот, а исто така завршила и некои активности за дупчење во регионот пред предвидениот рок.
„Позитивниот момент на кој бевме сведоци во изминатите неколку недели мора да продолжи со цел да се врати изгубената доверба и да се создаде основа за дијалог ориентиран кон решенија“, рече тој.
„Затоа денес патувам за Анкара за да го охрабрам мојот колега Мевлут Чавушоглу решително да го продолжи и консолидира конструктивниот тек од последните недели“, додаде тој.
Турција и Грција минатата недела објавија дека ќе продолжат со разговори на 25 јануари во Истанбул по пауза од четири години.
Разговорите се очекува да се фокусираат на билатералните спорови, вклучително и на поморските граници и правата за дупчење во регионот.
Турција, земја со најдолг континентален гребен во Источниот Медитеран, ги отфрли барањата за поморските граници на грчката администрација и на кипарските Грци и истакна дека овие прекумерни барања ги кршат суверените права и на Турција и на кипарските Турци.
Анкара минатата година испрати неколку бродови за истражување на енергетските ресурси во Источниот Медитеран, потврдувајќи ги своите права во регионот, како и оние на Турската Република Северен Кипар.
Турските лидери постојано нагласуваа дека Анкара е за решавање на сите отворени проблеми во регионот преку меѓународното право, добрососедските односи, преку дијалог и преговори.
