Ердоган во Јапонија посети изложба со тема од османлискиот период

КJОТО (АА) - Турскиот претседател Реџеп Таип Ердоган денеска ја посети изложбата на тема поврзана со османлискиот период во Кјото, Јапонија, по завршувањето на официјалните разговори во рамките на Самитот на Г-20 во градот Осака, јавува Anadolu Agency (AA).

Ердоган истакна дека Јапонија ја бележи 2019 година како Година на турската култура, а Турција испратила разни историски предмети од ерата на Османлиското Царство во Јапонија за изложбени цели.

„Изложбата, прво во Токио, а потоа во Кјото, побуди голем интерес“, додаде претседателот Ердоган, истакнувајќи дека културната размена е од огромно значење бидејќи создава можности за интеграцијата на народите на Турција и Јапонија.

Ердоган нагласи дека турското Министерство за култура и туризам има за цел промовирање на турската култура во странство преку поставување слични изложбени центри во различни земји.

Јапонската принцеза Акико од Микаса, која го придружуваше Ердоган, рече дека тоа што се домаќини на турските историски артефакти претставува извор на среќа за неа.

Јапонската принцеза додаде дека посакува народите на Јапонија и Турција подобро да се запознаат едни со други и да развијат подобри односи.

Изложбата со наслов „Богатството и традицијата на лалето во Османлиското Царство“, содржи колекција од 170 артефакти од османлискиот период - позајмени од палатата Топкапи во Истанбул - што ја отсликува богатата култура на едно од најдолгите царства во светската историја.