Израелската војска уби 90 Палестинци во болницата Ал-Шифа во Газа

КУДС/ЕРУСАЛИМ (АА) - Израелската војска денес објави дека убила 90 Палестинци во изминатите два дена во болницата Ал-Шифа и околните подрачја во градот Газа, пренесува Анадолу.

Во соопштението, Армијата, исто така, истакнува дека уапсила 160 Палестинци и ги префрлила во Израел на понатамошно испрашување, додека 300 сè уште се испрашуваат во болницата.

Се истакнува дека израелските војници сè уште се борат во областите околу болницата Ал-Шифа.

Се тврди дека израелската војска избегнува да им наштети на цивилите, пациентите, медицинските тимови и медицинската опрема во болницата.

Вчера, владината канцеларија за медиуми во Газа соопшти дека луѓето затворени во болницата Ал-Шифа, меѓу кои и пациенти и медицински тимови, се без храна и вода под израелската опсада откако израелската војска упадна во болницата рано во понеделникот.

Се наведува дека околу 250 палестински цивили се убиени и повредени во болницата од страна на израелските сили.

Од рано утрото во понеделникот, израелската војска започна напад врз болницата Ал-Шифа и нејзините околни подрачја, доведувајќи ги во опасност животите на десетици илјади Палестинци во болницата Ал-Шифа и околу неа.