Израелскиот премиер Бенјамин Нетанјаху се закани дека повторно ќе извршат напад врз Катар

ЕРУСАЛИМ (АА) – Израелскиот премиер Бенјамин Нетанјаху се закани дека повторно ќе изведат напад врз Катар доколку од земјата не бидат протерани претставниците на Хамас, известува Анадолу.

Во видеообраќањето што го објави Канцеларијата на израелскиот премиер на американската платформа за социјални медиуми X, Нетанјаху вели:

„Или протерајте ги или изведете ги пред лицето на правдата. Бидејќи ако вие не го сторите тоа, ние ќе го сториме тоа.“ Нетанјаху се закани дека повторно ќе го нападне Катар.

Нетанјаху, наведувајќи дека им се обратил на сите земји каде што се присутни претставниците на Катар и Хамас, се обиде да го легитимира израелскиот напад врз Доха споредувајќи го ненадејниот напад на Хамас на 7 октомври 2023 година со нападите од 11 септември.

Осврнувајќи се на осудите од целиот свет упатени кон Израел поради нападот врз суверенитетот на Катар и основните принципи на меѓународното право, Нетанјаху рече:

„Сега, разни земји низ целиот свет го осудуваат Израел. Тие треба да се срамат од себе.“

Вчера, израелската Армија започна напад со воени авиони врз зградата во која се наоѓаше преговарачкиот тим на Хамас во Доха, главниот град на Катар.

Хамас објави дека неговото раководство го преживеало израелскиот обид за атентат и дека синот на Калил Хаје, член на Политичкото биро на Хамас, заедно со четворица членови на Хамас и еден катарски полицаец, биле убиени во нападот.