Киев: Доколку Русија сака мир, мора веднаш да ги прекине непријателствата во Украина

ИСТАНБУЛ (АА) – Киев денес соопшти дека Москва мора „веднаш“ да ги прекине непријателствата во Украина доколку навистина сака мир откако рускиот претседател Владимир Путин објави едностран прекин на огнот на три дена, јавува Анадолу.

„Доколку Русија навистина сака мир, мора веднаш да го прекине огнот. Зошто да се чека до 8 мај? Ако може да се прекине сега или кој било датум во рок од 30 дена - тогаш тоа е реално, а не само поради парада“, напиша украинскиот министер за надворешни работи Андриј Сибиха на социјалната мрежа Х.

Тој додаде дека Украина е подготвена да поддржи траен и целосен прекин на огнот, додавајќи: „Ова е она што ние постојано го предлагаме, најмалку 30 дена.“

Претходно Путин нареди прекин на сите воени дејства во Украина од полноќ на 7 и 8 мај до полноќ на 10 и 11 мај, кога Москва се подготвува да ја одбележи 80-годишнината од победата на Советскиот Сојуз над нацистичка Германија за време на Втората светска војна

Денот на победата е празник што се одбележува во Русија и во повеќе поранешни советски земји на 9 мај, во чест на капитулацијата на нацистичка Германија во Втората светска војна, конфликт што Русија официјално го нарекува Голема татковинска војна.