Кремљ не се надева на исполнување на руските барања од Црноморскиот Договор за жито

ИСТАНБУЛ (АА) - Руски Кремљ денес соопшти дека не се надева дека ќе се исполнат неговите барања во врска со рускиот извоз како дел од Договорот за транспорт на жито преку Црно Море, кој истекува овој месец, јавува Анадолу.

„Засега овој дел од Договорот сѐ уште не е исполнет. Има уште време до истекот на Договорот, но не постои многу надеж“, им одговори портпаролот на Кремљ, Дмитриј Песков, на новинарите во Москва на прашањето дали има надеж за поврзување на руската Земјоделска банка (Роселхозбанк) со меѓународниот платен систем СВИФТ.

Песков рече дека Кремљ нема што да каже за приказната на „Фајненшл тајмс“, во која се тврди дека Европската Унија го разгледува предлогот да ѝ дозволи на Роселхозбанк да формира подружница што повторно ќе ја поврзе банката со меѓународниот платен систем СВИФТ.

„Не, засега немаме што да објавиме во однос на спроведувањето на делот од Договорот што се однесува на руската страна“, рече Песков.

Туркије, Обединетите нации, Русија и Украина во јули минатата година во Истанбул потпишаа Договор за продолжување на извозот на жито од три украински пристаништа на Црно Море, кој беше запрен по почетокот на војната во Украина во февруари минатата година.

Оттогаш Договорот беше неколкупати обновен, а на 18 мај беше продолжен за уште два месеца.

Москва го поврза вклучувањето на државната руска Земјоделска банка во меѓународниот платен систем СВИФТ, кој ќе овозможи непречен пристап за руските ѓубрива и други производи до светските пазари, за дополнително продолжување на Договорот.