Францускиот претседател Емануел Макрон вечерва објави дека неговата земја следната недела ќе биде домаќин на началниците на Генералштабот на вооружените сили на земјите што се подготвени да го гарантираат идниот мир во Украина, известува Анадолу.

Во телевизиското обраќање Макрон истакна дека војната во Украина еволуирала во поширока безбедносна криза што директно ја погодува Европа.

Тој ја обвини Русија дека се обидува да ги „тестира нашите граници“ преку кибернапади, мешање во изборите и воена агресија, истакнувајќи дека Франција и нејзините сојузници повеќе не можат да ѝ веруваат на Русија на дадениот збор.

„Русија стана, додека ви се обраќам и во годините што следуваат, закана за Франција и Европа“, рече тој.

Тој рече и дека Москва веќе го претворила украинскиот конфликт во глобален конфликт, обвинувајќи ја дека манипулира со изборите во Романија и Молдавија.

Потоа Макрон ја обвини Русија дека организира дигитални напади врз европските болници и дека се обидува да манипулира со лагите што ги шири на социјалните мрежи.

Франција ја повтори својата поддршка за Украина, наведувајќи дека каков било мировен договор не смее да биде на штета на украинскиот суверенитет.

„Мирот во Украина може да вклучува и распоредување европски сили. Тие не би оделе да се борат денес, не би оделе да се борат на првите линии на фронтот, но би биле таму кога ќе се потпише мирот, за да гарантираат негово целосно спроведување“, рече тој.

Тоа би вклучувало одржување долгорочна воена поддршка за Украина, додаде Макрон, во форма на план за цврст, траен и потврден мир, во координација со европските партнери и Украина.

Тој најави дека е започната „стратегиска дебата“ за нуклеарното одвраќање заради заштита на европските сојузници.

„Стратегиската дебата е повторно отворена за тоа како нашето одвраќање придонесува за заштита на нашите европски сојузници“, рече Макрон.

Францускиот претседател, исто така, ги повика европските нации да ги зајакнат своите одбранбени способности и предупреди дека започна нова ера на глобална нестабилност.