Министерството за здравство во Газа одлучи да ја прекине координацијата со СЗО за евакуација на болниците

ГАЗА (АА) - Палестинското Министерство за здравство во Појасот Газа денес одлучи да ја прекине координацијата со Светската здравствена организација (СЗО) во врска со евакуацијата на болниците во опколената енклава, јавува Анадолу.

Овој потег е приговор на задржувањето на голем број лица од медицинскиот персонал во болницата Ал-Шифа за време на процесот на евакуација што се спроведува во координација со СЗО.

„Одлучивме целосно да ја прекинеме координацијата со Светската здравствена организација за евакуација на повредените и медицинските тимови додека не се поднесе извештај за тоа што се случи со апсењето на медицинските тимови од страна на окупаторската војска“, изјави портпаролот на Министерството, Ашраф ал-Кудра, во градот Кан Јунис.

Претходно израелската радиодифузна мрежа соопшти дека израелската армија го привела директорот на болницата Ал-Шифа во Појасот Газа.

„Обединетите нации (ОН) нѐ информираа дека постои координација, преку СЗО, за евакуација на медицинскиот комплекс Ал-Шифа, кој е под постојана опсада, напади, уништување и одземање на храната и лековите“, изјави Ал-Кудра.

Тој додаде:

„Затоа конвојот на ОН, кој го претставуваше СЗО, тргна вчера да евакуира дел од пациентите и медицинскиот персонал што беа изложени на најстрашни нацистички практики во болницата. Но бевме изненадени бидејќи вчера конвојот беше запрен на окупацискиот контролен пункт што ги дели северниот и јужниот дел на Појасот Газа.“

Тој нагласи дека „окупациската војска ги третирала ранетите и медицинскиот персонал со екстремно насилство за време на апсењата, а работата завршила со апсење на голем број лица од медицинскиот персонал, вклучително и директорот на медицинскиот комплекс Ал-Шифа, Мохамад Абу Саламија“.

Ал-Кудра смета дека Израел и ОН се одговорни за апсењето на медицинскиот персонал.