Riyaz Khaliq Khaliq
22 Февруари 2022•Ажурирај: 22 Февруари 2022
САРАЕВО (АА) - Одлуката на рускиот претседател Владимир Путин да ги признае сепаратистичките региони Доњецк и Луганск во источна Украина наиде на остри реакции од многу земји, додека Кина изрази загриженост поради случувањата во источна Европа, јавува Агенција Анадолија (АА).
САД, Велика Британија, Франција, Обединетите нации и Турција остро го осудија потегот на Москва веднаш по одлуката за признавање на сепаратистичките територии, а подоцна им се приклучија уште неколку земји.
Министрите за надворешни работи на САД и Кина денес разговараа за руското признавање на источните региони на Украина како независни републики.
„Ја истакнав потребата од зачувување на суверенитетот и територијалниот интегритет на Украина“, изјави американскиот државен секретар Ентони Блинкен по телефонскиот разговор со кинескиот министер за надворешни работи Ванг Ји.
Кина, традиционалниот сојузник на Русија, повика на воздржаност и дипломатско решение на кризата.
Кинеското Министерство за надворешни работи соопшти дека Ванг му рекол на Блинкен дека неговата земја е „загрижена за случувањата во Украина“.
„Ставот на Кина по прашањето за Украина е доследен. Треба да се почитуваат легитимните безбедносни грижи на која било земја, како и целите и принципите на Повелбата на ОН. Досегашниот развој на украинското прашање е тесно поврзан со одложувањето на ефективното спроведување на новиот договор од Минск. Кина ќе продолжи да воспоставува контакт со сите страни врз основа на основаноста на случајот“, рече кинескиот министер Ванг, повикувајќи ги „сите страни на воздржаност“.
Италијанскиот министер за надворешни работи Луиџи ди Мајо изјави дека дипломатијата е клучна за смирување на тензиите меѓу Украина и Русија бидејќи војната ќе резултира со катастрофални последици во Европа.
Руското признавање на сепаратистичките региони Луганск и Доњецк во источна Украина го осудија и Австралија и Јапонија.
Австралискиот премиер Скот Морисон изјави дека Москва мора „безусловно да се повлече надвор од своите граници и да престане да им се заканува на соседите“.
„Русија треба да разбере дека обидот за инвазија на друга земја не може да им донесе предност и дека тоа сериозно и значително ќе ја чини Русија и нејзиниот меѓународен углед, но и секој друг што тоа го поддржува и одбива да го осуди“, рече Морисон.
Јапонскиот премиер Фумио Кишида изјави дека потезите на Русија се спротивни на меѓународните закони и го нарушуваат суверенитетот на Украина.
„Серијата руски потези го нарушуваат суверенитетот и територијалниот интегритет на Украина, што никогаш не го толерираме и остро го критикуваме. Внимателно ќе следиме како се развива ситуацијата“, ја пренесе изјавата на Кишида новинската агенција Кјодо.
Јужнокорејскиот претседател Мун Џе-ин изјави дека суверенитетот и територијалниот интегритет на Украина мора да се почитуваат.
„Воен конфликт би имал огромни последици во политиката и економијата не само на Европа, туку и на целиот свет“, рече јужнокорејскиот претседател.
Во меѓувреме, во Обединетите нации, синоќа итен состанок на Советот за безбедност свикаа Украина, САД и шест други земји, по одлуката на Русија да ги признае отцепените украински региони.
Рускиот претседател Владимир Путин во понеделникот во Кремљ ги призна украинските региони Доњецк и Луганск како независни држави и потпиша договори со сепаратистичките лидери од тие региони, потег што дополнително ги зголеми тензиите во регионот и пошироко.
