Папата Франциск се сретна со Зеленски при што разговараа за најновите случувања во Украина

АТИНА (АА) - Папата Франциск денес се сретна со украинскиот претседател Владимир Зеленски во Ватикан при што разговараа за најновите случувања во Украина, јавува Анадолу.

„Разговорите беа посветени на воената состојба и хуманитарната ситуација во Украина, како и начините на кои може да се стави крај на тоа, што ќе доведе до праведен и стабилен мир во земјата“, соопшти Кабинетот на папата.

На средбата се разговараше за повеќе прашања кои се однесуваат на верскиот живот во Украина.

„Сите народи имаат право да егзистираат во мир и безбедност. Нивните територии не смеат да бидат нападнати, а нивниот суверенитет мора да се почитува и гарантира преку мир, а војната и омразата носат само смрт и уништување за сите“, порача папата Франциск на социјалната мрежа Х.

Зеленски пристигна во Ватикан во рамките на европската турнеја. Тој веќе ги посети Лондон и Париз, а наскоро ќе отпатува и во Берлин.

„Прашањето за враќање на нашите луѓе дома од заробеништво беше главниот фокус на мојата средба со папата Франциск. Сметаме на помошта од Светата столица“, рече Зеленски во пораката на социјалната мрежа Х.