Полска го затвори својот генерален конзулат во рускиот град Санкт Петербург

ИСТАНБУЛ (АА) - Полска денес официјално го затвори својот генерален конзулат во рускиот град Санкт Петербург по повеќе од еден месец откако Москва соопшти дека ќе ја затвори дипломатската мисија како одговор на тоа што Варшава го затворила нејзиниот конзулат во градот Познан, јавува Анадолу.

Во соопштението на полското Министерство за надворешни работи се наведува дека во Санкт Петербург се одржала церемонија на затворање на генералниот конзулат со учество на полскиот амбасадор во Русија, Кшиштоф Крајевски.

Руската државна новинска агенција ТАСС извести дека полските знамиња и знамињата на ЕУ се отстранети од јарболите надвор од зградата, како и знакот на дипломатската мисија до влезот на зградата.

Руското Министерство за надворешни работи на 5 декември соопшти дека Москва „ќе ја повлече согласноста“ за функционирање на конзулатот од 10 јануари 2025 година и објави дека три лица од дипломатскиот персонал во полскиот конзулат, исто така, се прогласени за персона нон грата.

Во соопштението се вели дека одлуката на Москва е „водена од принципот на реципроцитет“, обвинувајќи ја Полска дека води „отворено непријателска политика“ кон Русија.

Во октомври полскиот министер за надворешни работи Радослав Сикорски објави дека Варшава одлучила да го затвори рускиот конзулат во Познан и да протера дипломати поради наводни обиди за саботажа.