Zeynep Katre Oran
04 Декември 2023•Ажурирај: 05 Декември 2023
АНКАРА (АА) - Лекарите кои работат во јужниот дел на блокираниот Појас Газа објавија дека заразните болести забрзано се шират во регионот поради големиот број раселени од израелските напади, јавува Анадолу.
Лекарите кои работат во болницата Насер во градот Хан Јунис во јужниот дел на Газа, во изјава за „Индипендент“ го привлекоа вниманието на брзото ширење на заразните болести во регионот.
Лекарите наведоа дека заразните болести брзо се шират во регионот поради големиот број цивили принудени да ги напуштат своите домови во северниот дел на Појасот Газа.
Истакнувајќи дека недостигот на неопходни вакцини за новороденчињата предизвикува болестите побрзо да се шират во болниците, лекарите изјавија и дека ги згрижуваат повредените во Хан Јунис, кој е под интензивни израелски напади.
Лекарот волонтер Асем Мохамед истакна дека пренаселеноста создава поволни услови за ширење на заразните болести, додека недостатокот на медицинска опрема и ограничениот пристап до чиста вода ја влошува ситуацијата.
Мохамед изјави дека болничката средина е „полна со заразни болести како што се габични инфекции, инфекции на кожата и пневмонија, како и епидемиолошки проблеми“.
Докторот Јусеф Аднан рече дека секојдневно лекуваат илјадници луѓе со дијареја.
„Состојбата во болницата е катастрофална“, изјави Аднан.
Генералниот директор на Светската здравствена организација (СЗО), Тедрос Аданом Гебрејесус, вчера сподели објава на социјалната мрежа Х за ситуацијата во Газа, која е под интензивни израелски напади.
„Вчера, нашиот тим ја посети болницата Насер во јужниот дел на Газа. Болницата лекува 1.000 пациенти, три пати повеќе од нејзиниот капацитет. Безброј луѓе го пополнуваат секој агол од установата барајќи засолниште. Овие услови се незамисливо несоодветни во однос на обезбедувањето здравствени услуги“, додаде Гебрејесус.
