Путин: „Москва поставува тактичко нуклеарно оружје во Белорусија“

АНКАРА (АА) - Со потегот што со сигурност ќе предизвика тензии во Украина, која е разорена од војната, и нејзините западни сојузници, Русија ќе ја заврши изградбата на специјален магацин за тактичко нуклеарно оружје во соседна Белорусија, изјави рускиот претседател Владимир Путин, известува Анадолу.

„Русија веќе ѝ го предаде на Белорусија комплексот 'Искандер', во кој може да се складира нуклеарно оружје“, изјави Путин во интервју за телевизискиот канал „Русија-24“.

Според зборовите на Путин, неговиот белоруски колега Александар Лукашенко долго поставувал прашања за распределувањето на руско тактичко нуклеарно оружје во Белорусија, што таму не е присутно уште од раните 1990-ти години, по распадот на СССР.

„Се договоривме со Лукашенко да поставиме тактичко нуклеарно оружје во Белорусија, без притоа да го кршиме режимот на неширење“, рече Путин, пренесува руската новинска агенција ТАСС.

Путин додаде дека САД одамна поставиле такво оружје во повеќе земји, така што нема ништо необично во барањето од Белорусија.

Според неговите зборови, Русија до 1 јули ќе ја заврши изградбата на магацинот за тактичко нуклеарно оружје во Белорусија. Притоа, контролата на вооружувањето нема да биде префрлена врз Минск.

Откако Русија пред 13 месеци започна војна во соседна Украина, западните лидери изразуваат загриженост дека Москва би можела да го претвори судирот во нуклеарен, врз основа на изјавите од руска страна, според кои Запад смета дека сите опции се на маса.