Речиси целото обработливо земјиште во Газа е уништено или нема пристап до него, соопшти агенција на ОН

ИСТАНБУЛ (АА) - Две години по започнувањето на израелскиот геноцид речиси целото обработливо земјиште во Појасот Газа е уништено или нема пристап до него, поради што семејствата остануваат без приходи, а цените на храната се зголемуваат до невидени нивоа, соопшти денес Агенцијата на ОН за палестински бегалци (УНРВА), јавува Анадолу.

„Речиси целото земјоделско земјиште во Газа е уништено или непристапно“, соопшти агенцијата на американската компанија за социјални медиуми X.

„Еден килограм домати што некогаш чинеше 60 центи сега чини 15 долари - ако воопшто се најдат.“

Организацијата соопшти дека семејствата што некогаш се занимавале со земјоделство „сега немаат приходи“ и дека дури и кога дел од храната повторно се појавува на пазарите, „луѓето не можат да си дозволат“ да ја купат.

„Сѐ додека не се обнови земјоделскиот сектор во Газа, мора да има неограничен проток на помош“, соопшти УНРВА.

Канцеларијата за медиуми на Владата во Газа вчера соопшти дека на територијата било дозволено да влезат вкупно 653 камиони со хуманитарна помош откако договорот за прекин на огнот стапи на сила на 10 октомври.

Првата фаза од договорот беше постигната меѓу Израел и Хамас претходно овој месец, врз основа на план претставен од Трамп. Првата фаза вклучува ослободување на израелски заложници во замена за палестински затвореници. Во планот, исто така, се предвидува обнова на Газа и воспоставување нов управувачки механизам без Хамас.

Според договорот, 600 камиони со хуманитарна помош треба дневно да влегуваат во Газа, меѓу кои и оние со гориво и гас за готвење.

Од октомври 2023 година во израелските напади се убиени речиси 68.000 Палестинци во Газа, повеќето од нив жени и деца, а енклавата во голема мера е несоодветна за живеење.