Русија и Индија се стремат кон рекордно високо ниво на трговија од 100 милијарди долари

МОСКВА (АА) – Рускиот претседател Владимир Путин денес соопшти дека Москва и Њу Делхи работат на зголемување на билатералната трговија до 100 милијарди долари, откако трговската размена меѓу двете земји достигна рекордни бројки, јавува Анадолу.

Говорејќи на прес-конференција во Њу Делхи по средбата со индискиот премиер Нарендра Моди, Путин истакна дека минатата година трговската размена меѓу Русија и Индија пораснала за дополнителни 12 %.

„Различните статистики малку варираат, но севкупно износот се движи околу 64–65 милијарди долари. Се очекува оваа година волуменот да остане на приближно исто ниво. Меѓутоа, реално е да ја подигнеме оваа бројка до 100 милијарди долари“, рече тој.

За да се достигне целта, Путин објасни дека е усогласена програма за руско-индиска економска соработка до 2030 година, која ги дефинира насоките за меѓувладините тела со цел олеснување на трговијата, напредување на заедничките проекти и јакнење на технолошката и инвестициската соработка.

Москва и Њу Делхи, исто така, работат на договор за слободна трговска зона меѓу Индија и Евроазиската економска унија.

Во услови на 50 % царина што Вашингтон ја воведе на индискиот увоз, делумно поради купувањето руска нафта од страна на Индија во контекст на конфликтот во Украина, Путин истакна дека Русија е подготвена да продолжи да обезбедува непрекинати испораки на гориво за индискиот пазар.

Тој додаде дека двете земји доследно преминуваат на користење национални валути во меѓусебните плаќања со цел да се избегне употребата на доларот како политичка алатка.

Според него, уделот на рубљата и рупијата во билатералните трансакции достигнал 96 %.