Русија тврди дека соборила украински дрон во обид за напад над Москва

ИСТАНБУЛ (АА) - Русија утрово соопшти дека соборила украински дрон во обид за напад над Московскиот Регион, пренесува Анадолу.

„Утрово, 31 август, спречен е уште еден терористички напад на режимот на Киев со употреба на беспилотно летало против објекти во Руската Федерација“, се вели во соопштението на руското Министерство за одбрана.

Во соопштението се истакнува дека дронот бил соборен од системите за противвоздушна одбрана над московскиот округ Воскресенски.

Градоначалникот на Москва, Сергеј Собјанин, во изјава преку Телеграм соопшти дека нема жртви ниту материјална штета и додаде дека службите за итни случаи се на терен.

Украинските власти сè уште не се огласија за инцидентот, а независната проверка на тврдењата на Русија е тешка поради тековната војна.

Нападите со беспилотни летала во Русија драматично се зголемија во последните месеци. Руските власти ја обвинуваат Украина дека стои зад нив.

Иако Киев досега нема преземено одговорност, украинскиот претседател Владимир Зеленски во јули рече дека нападите на руска територија се „неизбежен, природен и апсолутно фер процес“.