Elena Teslova
27 Декември 2024•Ажурирај: 28 Декември 2024
МОСКВА (АА) - Шефот на руската Федерална агенција за воздушен транспорт, Дмитри Јадров, денес изјави дека авионот „Ембраер Е190“ на „Азербејџан ерлајнс“, што се урна во Казахстан, не можел да слета во градот Грозни поради напад со беспилотно летало на Украина и густата магла, јавува Анадолу.
Руската страна веднаш ги информирала казахстанските и азербејџанските власти за целосната и сеопфатна подготвеност да соработуваат во истрагата за оваа трагедија, се вели во соопштението на Јадров.
Официјалниот претставник ниту ги потврди ниту ги демантираше извештаите дека авионот бил соборен од руски противвоздушен проектил, велејќи: „Потребно е внимателно и целосно да се проверат сите околности на инцидентот“.
„Би сакал да истакнам дека ситуацијата на овој ден и во овие часови во областа на аеродромот во Грозни беше многу тешка. Во тоа време, украинските борбени беспилотни летала извршија терористички напади врз цивилната инфраструктура во градовите Грозни и Владикавказ“, додаде тој.
Авионот се обиде да слета кога беше во сила планот „Carpet“ - режим кога небото е затворено за сите авиони и сите авиони или хеликоптери во воздухот се принудени веднаш да слетуваат или да се повлечат од одредена област.
„Покрај тоа, имаше густа магла во реонот на аеродромот во Грозни. Пилотите направија два обиди да слетаат со авионот во Грозни, кои беа неуспешни. На командантот му беа понудени други аеродроми. Тој реши да замине на аеродромот во Актау“, изјави тој.
Јадров укажа на „многу различни околности кои треба заеднички да се истражат“ и ја повтори подготвеноста на Русија за соработка со ангажираните страни.
Авионот на „Азербејџан ерлајнс“, кој леташе на релацијата од Баку кон градот Грозни во руската Чеченска Република, во средата се урна со 67 патници во близина на Актау, лоциран на брегот на Каспиското Море.
Казахстанските власти соопштија дека во несреќата животот го загубиле 38 лица, додека 29 преживеале.
