Handan Kazancı
29 Октомври 2021•Ажурирај: 01 Ноември 2021
ИСТАНБУЛ
Американскиот државен секретар Ентони Блинкен вчера најави дополнителна хуманитарна помош од речиси 144 милиони долари за жителите на Авганистан, јавува Агенција Анадолија (АА).
„Како дел од нашата долготрајна посветеност на жителите во Авганистан, САД денеска објавија хуманитарна помош од речиси 144 милиони долари за погодените од тековната хуманитарна криза“, рече Блинкен во соопштението.
„Со оваа помош, вкупната американска хуманитарна помош за Авганистан и авганистанските бегалци во регионот, оваа година изнесува речиси 474 милиони американски долари, што е најголемиот износ на помош од која било нација“, додаде тој.
Блинкен истакна дека помошта се обезбедува директно на независни хуманитарни организации, вклучително и на Високиот комесаријат за бегалци на Обединетите нации (UNHCR), Детскиот фонд на Обединетите нации (UNICEF), Меѓународната организација за миграција (IOM), Светската здравствена организација (WHO) и на други меѓународни и невладини организации.
„Ова финансирање обезбедува поддршка директно за некои од повеќе од 18 милиони ранливи Авганистанци на кои им е потребна помош во регионот, вклучувајќи ги и авганистанските бегалци во соседните земји“, рече тој.
„Дополнителната хуманитарна помош ќе им овозможи на нашите партнери да обезбедат заштита која спасува животи, поддршка за безбедноста на храната, основна здравствена заштита, помош во зимата, логистика и итна помош во храна како одговор на растечките хуманитарни потреби влошени од недостигот на здравствена заштита, Ковид-19, сушата, неисхранетоста и претстојната зима“, рече тој.
Блинкен додаде дека финансирањето ќе биде од корист за жителите на Авганистан, а не за талибанците.
Тој ги повика земјите домаќини да ги држат своите граници отворени за Авганистанците кои бараат меѓународна заштита.
Најавата за хуманитарна помош дојде откако САД го завршија повлекувањето од Авганистан поради офанзивата на талибанците што доведе до соборување на Владата. Американскиот ферибот од Авганистан излезе со над 120.000 луѓе, додека талибанците презедоа контрола во Кабул.
