САД: При пад на авион со маринци загинаа 16 лица

ЊУЈОРК (АА) - Транспортен авион на американски маринци се урна во сојузната американска држава Мисисипи. Во несреќата животот го загубија 16 лица, јавува Anadolu Agency (AA).

Во врска со несреќата што се случи во подрачјето Делта, во сојузната држава Мисисипи, изјава за медиумите даде шерифот на округот Лефлор, Рики Бенкс. Бенкс соопшти дека воениот транспортен авион од типот C-130 се урнал на 135 километри северно од Џексон.

Директорот на агенцијата за вонредни состојби на округот Лефлор, Фред Рендл, соопшти дека успеале да дојдат до телата на 16 загинати на местото каде што се урнал авионот.

Директорот на Агенцијата за вонредни состојби на Мисисипи, Ли Смитсон, изјави дека авионот се урнал северно од Џексон, во близина на границата на округот Лефлор – Санфлауер, на површина обрасната со грмушки и густа вегетација.

Американските маринци го користат воениот транспортен авион од типот C-130 за транспорт на гориво и материјали. За време на студената војна, транспортниот авион C-130 Херкул се произведуваше со четири пропелерски мотори.